སྤྲེལ་ཟླའི་ཚེས་བཅུ།

ལོ་བསྟར་བཞིན་དུ་ ཟླཝ་༥ པའི་ཚེས་༡༠ ལུ་ སྤྲེལ་ཟླའི་ཚེས་བཅུ་ཟེར་ སྤྱིར་ནང་པ་སངས་རྒྱས་པ་དང་ ཁྱད་པར་དུ་  ང་བཅས་ར་ འབྲུག་མི་ཚུ་གིས་ སྔོན་གོང་ལས་ སངས་རྒྱས་གཞན་ལས་ལྷག་པའི་བཀའ་དྲིན་ཅན་གྱི་བདག་ཉིད་ དུས་ངན་སྙིགས་མ་ལྔ་བདོའི་ སྐྱབས་མཆོག་བླ་ན་མེད་པ་ ཨོ་རྒྱན་གུ་རུ་རིན་པོ་ཆེའི་ འཁྲུངས་སྐར་དུས་ཆེན་གྱི་ཉིནམ་སྦེ་ བརྩི་སྲུང་ཞུ་སྲོལ་ཡོདཔ་བཞིན་དུ་ ད་རེས་ཡང་ བཀའ་དྲིན་དྲན་པའི་ཐོག་ལས་ བརྩི་སྲུང་དང་འབྲེལ་ཏེ་ གསོལ་བ་བཏབ་དགོཔ་དེ་ ག་ནི་བ་གལ་ཆེ་ཟེར་ ཞུ་ནི་ཨིན།

  དེ་ཡང་ ཨོ་རྒྱན་གུ་རུ་རིན་པོ་ཆེ་དེ་ ང་བཅས་ར་ ལས་ཉོན་ཚུར་མཐོང་ཅན་ཚུ་གིས་ བླམ་བཟུམ་ཅིག་དང་ གྲུབ་ཐོབ་བཟུམ་ཅིག་ ཨིནམ་འདྲས་མནོ་བ་ཅིན་ དེ་སྦེ་མེན་པར་ སྐུ་ཚེ་གོང་མ་ སངས་རྒྱས་བཅོམ་ལྡན་འདས་ཀྱི་སྐབས་ལུ་ གདུལ་བྱ་འདྲེན་ཐབས་ཀྱི་དོན་ལུ་ སྐུ་གཟུགས་ལུ་ ཆོས་གོས་རྣམ་གསུམ་བཞེས་ཏེ་ ཐེག་ཆེན་ ཐེག་དམན་གྱི་ཆོས་འཁོར་སྐོར་སྐུ་ཚེ་འོག་མ་ གུ་རུ་རིན་པོ་ཆེའི་སྐབས་ལུ་ སྐུ་གཟུགས་ལུ་ ན་བཟའ་གསང་ཕོད་ཟབ་བེར་ སྔགས་ཆས་བཞེས་ཏེ་ འཁོར་དཔའ་བོ་མཁའ་འགྲོ་ རྣལ་འབྱོར་ གྲུབ་ཐོབ་ཚོགས་ཀྱིས་སྐོར་ཏེ་བཞུགས་པའི་ཚུལ་སྟོན་མི་དེ་ཡང་ ཧེ་མ་ སྟོན་པ་སངས་རྒྱས་བཅོམ་ལྡན་འདས་ལྕགས་འབྲུག་ཟླཝ་༤ པའི་ཚེས་༡༥ ལུ་ རྩྭ་མཆོག་གྲོང་ལུ་སྦེ་ གདུལ་བྱ་རྟག་འཛིན་ཅན་གྱི་ངོར་ རེ་ཞིག་ སྐུ་མྱ་ངན་ལས་འདས་པའི་ ཚུལ་སྟོན་པའི་སྐབས་ལུ་ འཁོར་ཉན་ཐོས་ཚུ་ མྱ་ངན་གྱིས་དྲན་མེད་བརྒྱལ་ཏེ་ སངས་པའི་ཤུལ་ལས་ སངས་རྒྱས་ཀྱིས་ཞལ་འཛུམ་མཛད་དེ་

ང་ནི་མྱ་ངན་འདས་འོག་ནས།།

ལོ་ནི་བཅུ་གཉིས་ལེན་པའི་ཚེས།།

ཨོ་རྒྱན་ཡུལ་གྱི་ནུབ་བྱང་མཚམས།།

དྲི་མེན་ཀོ་ཤའི་མཚོ་གླིང་དུ།།

པདྨ་གེ་སར་སྡོང་པོ་ལས། །

ང་བས་ལྷག་པའི་སྐྱེས་བུ་ནི། །

པདྨ་འབྱུང་གནས་ཞེ་བྱ་བ། །

གསང་སྔགས་སྟོན་པའི་བདག་པོ་འབྱུང་། །

ཞེས་གསུངསམ་ད་ འཁོར་ཉན་ཐོས་ཚུ་གི་སེམས་ཁར་ སངས་རྒྱས་ཁོ་ར་ལས་ལྷགཔ་ཅིག་མི་འོང་ཟེར་ ཐེ་ཚོམ་ཆགསཔ་ད་ སངས་རྒྱས་ཀྱིས་མཁྱེན་ཏེ་ སྐྱེས་བུ་དེ་ནི་ དུས་གསུམ་གྱི་སངས་རྒྱས་ཀུན་ལས་ཁྱད་འཕགས་ལྔ་ལྡན་ཨིནམ་ལས་ མགོན་པོ་ཚེ་དཔག་མེད་དངོས་ཨིན་ནོ་ཟེར་ ད་རུང་ 

ང་ནི་མྱ་ངན་འདས་འོག་ཏུ། །

ལོ་ནི་བཅུ་རུ་གཉིས་ཆད་ནས། །

འཇིག་རྟེན་ཀུན་ལས་རྒྱལ་བའི་མཆོག །

ཨོ་རྒྱན་ཡུལ་དུ་ང་ཉིད་འབྱུང་། །

པདྨ་འབྱུང་གནས་ཞེས་བྱ་བ། །

གསང་སྔགས་སྟོན་པའི་ལུང་དུ་བསྟན། །

ཟེར་ཁོ་ར་གི་ ཞལ་ལས་གསུང་ཡོདཔ་བཞིན་དུ་ འདས་ལོ་ལྔ་པ་ ཤིང་སྤྲེལ་ཆུ་སྟོད་ ཟླཝ་༦ པའི་ཚེས་༡༠ ལུ་ ཨོ་རྒྱན་ཡུལ་གྱི་ནུབ་བྱང་མཚོ་དྷ་ན་ཀོ་ཤའི་སྦུག་ལུ་ མེ་ཏོག་པདྨ་མའི་ཟེའུ་འབྲུ་ལས་ སྐུ་འཁྲུངས་འཁྲུངསམ་ཨིནམ་ལས་ དུས་གསུམ་གྱི་སངས་རྒྱས་དངོས་ཨིན།

དེ་མ་ཚད་ བུམ་ཐང་ལྕགས་མཁར་རྒྱལཔོ་ སི་ཏ་ར་ཛ་གིས་ བྱོན་པར་གསོལ་བར་བཏབ་པའི་ངོར་ ཞལ་གྱིས་བཞེས་ཏེ་ རྒྱལཔོ་ལུ་ གནོདཔ་བཀལ་མི་ཤེལ་གིང་དཀར་པོ་གིས་གཙོས་པའི་ ས་གནས་ཀྱི་ གནས་བདག་གཞི་བདག་ཚུ་ དམ་ལུ་བཏགས་ཏེ་ བསྟན་པ་སྲུང་བའི་ཆོས་སྲུང་སྦེ་བསྐུལ་ཏེ་ འགྲོ་བ་སེམས་ཅན་གྱི་མཐའ་དོན་ལུ་ མཛད་པ་འཕྲིན་ལས་བསམ་གྱིས་མི་ཁྱབ་པ་མཛད་ཡོདཔ་བཞིན་དུ་ དུས་རབས་༨ པའི་སྔ་ཆ་ཁམས་ཅིག་ལས་ བོད་ལས་མར་ ལྷུན་རྩེ་སེང་གེ་རྫོང་ལུ་བྱོན་ དེ་ལས་ གུ་རུ་རྡོ་རྗེ་གྲོ་ལོད་ཀྱི་རྣམ་པར་ སྟག་མོའི་གུ་བཞོན་ཏེ་ སྤ་རོ་སྟག་ཚང་ལུ་བྱོན་ཏེ་ བོད་ཀྱི་གཞི་བདག་གཏེར་སྲུང་ག་ར་ དམ་ལུ་བཏགས་ཐོག་ལས་ འབྲུག་གི་མཐའ་གྲུར་ཞབས་ཀྱིས་བཅགས་ཏེ་ སྦས་ཡུལ་ཁྱད་པར་ཅན་ལུ་ བྱིན་གྱིས་བརླབས་གནངམ་ལས་ ད་ལྟོ་ང་བཅས་ག་ར་ ནད་མུག་འཁྲུག་རྩོད་མེད་པར་ རྫོགས་ལྡན་བདེ་སྐྱིད་ཀྱི་ དཔལ་ལུ་ལོངས་སྤྱོད་དེ་ཡོད་མི་དེ་ སྙིགས་མ་ལྔ་བདོའི་ སྐྱབས་མཆོག་བླ་ན་མེད་པ་ ཨོ་རྒྱན་གུ་རུ་རིན་པོ་ཆེའི་ མཛད་འཕྲིན་ལུ་བརྟེན་ཏེ་ ཨིནམ་ལས་ བཀའ་དྲིན་དྲན་པའི་སྒོ་ལས་ གསོལ་བ་བཏབ་དགོཔ་དེ་ གལ་ཆེ་ཟེར་ ཞུ་ནི་ཨིན།

གཞན་ཡང་ ཟླཝ་༥ པའི་ཚེས་༡༠ དང་ ཟླཝ་༦ པའི་ཚེས་༡༠ ཟེར་ ཟླ་གྲངས་ཀྱི་ཁྱད་པར་བཀོད་དེ་འདུག་ཟེར་ ཐེ་ཚོམ་ཟ་བ་ཅིན་ ཨོ་རྒྱན་གུ་རུ་རིན་པོ་ཆེའི་དགོངས་དུས་ཀྱི་ གཞུང་ལུགས་ལས་ འབད་བ་ཅིན་ རང་ཟླ་༡༢ པ་དེ་ སྟག་ལོ་སྦེ་རྩིསཝ་ད་ ཟླཝ་༦ པ་དེ་ སྤྲེལ་ཟླ་ཕོག་ནི་དེ་གིས་ རང་ཟླ་༦ པའི་ཚེས་༡༠ ལུ་ དུས་ཆེན་སྦེ་བརྩི་སྲོལ་ཅིག་ཡོདཔ་ད་ རང་ལུགས་ཕུབ་པ་ཡབ་སྲས་ཀྱི་ལུགས་ལས་ འབད་བ་ཅིན་ རང་ཟླ་༡༡ པ་དེ་ ནག་རྩིས་ཀྱི་ལོ་མགོ་འཁྲུལ་མེད་དམ་ སྟག་ལོ་ཨིནམ་སྦེ་ བཞག་ནི་དེ་གིས་ རང་ཟླ་༥ པ་ལུ་ སྤྲེལ་ཟླ་ཕོགཔ་བཞིན་དུ་ རང་ལུགས་ཟླ་༥ པའི་ཚེས་༡༠ ལུ་ ཨོ་རྒྱན་གུ་རུ་རིན་པོ་ཆེའི་འཁྲུངས་སྐར་དུས་ཆེན་སྦེ་ བརྩི་སྲུང་ཞུཝ་ཨིནམ་ད་ དད་ལྡན་ཕོ་མོ་ག་ར་གིས་ རྣམ་དཀར་གྱི་ལཱ་ ཚོགས་བསགས་སྒྲིབ་པ་སྦྱང་ནིའི་དོན་ལུ་འབད་བརྩོན་བསྐྱེད་གནང་དགོཔ་དེ་ ག་ནི་བ་གལ་ཆེ་ཟེར་ ཞུ་ནི་ཨིན་ནོ།།

Source:Fbook