བཤེས་སྤྲིངས།
༉ བཤེས་པའི་སྤྲིངས་ཡིག་འདི་ སངས་རྒྱས་ཀྱི་གསུང་ མདོ་དང་ རྒྱུད་སྡེ་ཚུ་དང་ རྗེས་འཇུག་མཁས་པའི་བསྟན་བཅོས་ཚུ་གི་ནང་ལས་ཐོན་མི་ ཆོས་སྲིད་ཟུང་འབྲེལ་གྱི་སྤང་བླང་ཚུལ་བཞིན་དུ་སྟོན་མི་གི་དཔེ་གཞུང་ཅིག་ཨིན། དཔེ་དེབ་འདི་ ཧེ་མ་དུས་རབས་༡པའི་་སྐོར་ཆ་ལུ་ དཔལ་མགོན་འཕགས་པ་ཀླུ་སྒྲུབ་ཀྱིས་ ཁོ་རའི་གྲོགས་བཤེས་ རྒྱལཔོ་བདེ་སྤྱོད་བཟང་པོ་ལུ་འཕྲིན་ཡིག་འབད་བརྩམས་ཏེ་གནང་གནངམ་འབད་ནི་འདི་གིས་ མིང་ལུ་ཡང་ བཤེས་པའི་སྤྲིངས་ཡིག་ཟེར་ཞུཝ་ཨིན་མས།
འདི་གིས་ང་བཅས་ར་ལུ་ གནས་སྐབས་མངོན་པར་མཐོ་བ་ ལྷ་དང་མིའི་གོ་འཕང་དང་ མཐར་ཐུག་སངས་རྒྱས་ཀྱི་གོ་འཕང་ འཐོབ་ནིའི་ལམ་སྟོནམ་མ་ཚད། རྒྱལ་ཁབ་ནང་རྒྱལ་ཡོངས་དགའ་སྐྱིད་དཔལ་འཛོམས་འགྲུབ་ནིའི་ སེམས་ཀྱི་བདེ་སྐྱིད་འགྲུབ་ཐབས་ལུ་ཕན་པའི་ ལུས་ངག་ཡིད་གསུམ་གྱི་སྤྱོད་ལམ་བཟང་པོ་ཚུ་ཡང་སྟོན་དོ་ཡོདཔ་ལས། ང་བཅས་ར་ལུ་ བརྩི་མཐོང་དང་ བསམ་སྤྱོད་ཤེས་ཡོན་འཐོབ་ནི་ལུ་ ཕན་ཐོགས་སྦོམ་འབད་ར་ཡོདཔ་ཨིན། དེ་ནང་ལས་ཡང་ འཕྲིན་ཡིག་གནང་ས་འདི་རྒྱལ་པོ་བདེ་སྤྱོད་བཟང་པོ་ལུ་འབད་ནི་དེ་གིས་ འཇིག་རྟེན་སྲིད་ཀྱི་ལམ་ལུགས་ལུ་གཙོ་བོར་བཏོན་ཏེ་གསུངས་ཡོདཔ་ལས་ འཇིག་རྟེན་པ་ལུ་མཁོ་ཆེ་བའི་བསླབ་བྱ་མང་རབས་ཅིག་གསུངས་ཏེ་ཡོད། དེ་མ་ཚད་ ལས་རྒྱུ་འབྲས་དང་དགེ་བའི་ཕན་ཡོན་ སྡིག་པའི་ཉེས་དམིགས་ ལྷ་ཆོས་དགེ་བ་བཅུ་དང་འཇིག་རྟེན་ཡང་དག་པའི་ལྟ་བ་ དེ་ལས་ ཐར་པའི་ལམ་བདེན་པ་བཞི་ཚུ་གི་སྐོར་ལས་ གསུངས་ཏེ་ཡོདཔ་ལས་ ཚེའདི་ཕྱི་གཉིས་ཆ་ར་ལུ་ ཕན་པའི་ཞལ་གདམས་གལ་ཆེ་ཤོས་ཅིག་ཨིན།
Comments
Post a Comment