གཉིད་ལམ་འདྲ་བའི་མི་ཚེ་འདི།
རང་གི་ཚེ་ལུ་ རྟག་པ་དང་གཏན་པ་ཅིག་ ག་ནི་ཡང་མེདཔ་ཨིན། ཁ་ཙ་མཐོངམ་མི་ གཉིད་ལམ་བཟང་ངན་དང་འདྲ་བའི་ དལ་འབྱོར་མི་ལུས་རིན་ཆེན་འདི་ ཐོབ་པར་དཀའ་བ་ མེདཔ་འགྱོཝ་འཇམ་པ་གཅིག་ཨིན། གཉིད་ལམ་ནང་ དགའ་སྡུག་གི་ཉམས་ཚུ་ གཉིད་བསད་པའི་ཚེ་ ག་ར་ཡལ་འགྱོ་བ་མ་ཚད་ རང་རྐྱངམ་གཅིག་ རང་གི་མལ་ཆ་ནང་ལས་ ལོངམ་ཨིན། འདི་བསྒང་ གཉིད་ལམ་གྱི་ཉམས་ མ་མྱོང་ག་ཟེར་བ་ཅིན་མྱོང་ཡི། ད་ལྟོ་མཐོང་དུས་ཡོད་ག་ཟེར་བ་ཅིན་ མེད་པའི་ཁར་ རང་དང་གཉིད་ལམ་གྱི་བག་ཆགས་གཉིས་ སོ་སོ་སྦེ་ཁ་འབྱལཝ་ཨིན། འདི་འབདཝ་ལས་ དཀའ་སྡུག་ག་ར་ མི་རྟག་པའི་རང་བཞིན་དང་ འཆི་བའི་དུས་ལུ་འབབ་པའི་ཚེ་ འཇིག་རྟེན་ནང་མྱོངམ་མི་ག་ར་ གཉིད་ལམ་དང་འདྲཝ་སྦེ་ རང་གི་རྣམ་ཤེས་རྐྱངམ་གཅིག་ སྡོད་སའི་གནས་དང་ རང་དབང་མེད་པར་ འཁོར་བར་འཁྱམས་པའི་དུས་འདི་ དུས་ནམ་ལྷོད་འོང་ག་ ག་གིས་ཡང་ སླབ་མ་ཚུགས་པའི་ དུས་ཚོད་གཅིག་ཨིན།
རྟག་པ་མེད་པའི་ མི་ཚེ་གི་ཚུལ་འདི་ཡང་ སྔོན་གྱི་རྒྱལ་བ་རྫོགས་པའི་སངས་རྒྱས་དང་ མཁས་གྲུབ་གཉིས་དང་ལྡན་པ་ འབྱུང་བ་བཞི་གི་རང་དབང་ཐོབ་མི་ གྲུབ་ཐོབ་དང་ བླམ་རིན་པོ་ཆེ་ རང་གི་ཨ་རྒས་དང་ཨང་རྒས་ གཉེན་ཉེ་འཁོར་ ཁྱིམ་ཚང་ལ་ལུ་ ད་ལྟོ་མ་པ་ལས་རང་མཐོང་ཚུགས་པའི་ རང་དབང་མེད་མི་ལུ་བལྟ་སྟེ་ མི་རྟག་པ་སྒོམ་དགོཔ་ཨིན།
དེ་མ་ཚད་ རང་གི་ལུས་ལུ་བལྟ་རུང་ ན་ཧིང་བཏབ་མི་པར་འདི་ དུས་ཅི་བལྟཝ་ད་ བཀྱག་ཡལ་འཕེལ་གྱི་འགྱུར་བ་དང་ དུས་ཅི་བཏབ་མི་པར་འདི་ སང་ཕོད་བལྟ་བ་ཅིན་ ད་རིས་བ་ལྷག་པའི་འགྱུར་བ་འོང་སྲིད། ཧེ་མའི་ཕོ་ལེགས་མོ་ལེགས་ཀྱི་ འཁྲབ་རྩེདཔ་ མིང་གཏམ་དང་སྐད་གྲགས་ཅན་འཐོན་མི་ཚུ་ཡང་ གྱང་མཐོང་ནང་ན་རང་ རིམ་གྱིས་ བཀྱག་ཡལ་སར་མཐོངམ་ད་ མི་རྟག་པ་འདི་ རང་གི་གདོང་ཁར་རང་འདུག དེ་འབདཝ་ལས་ རྟག་པ་མེད་པའི་ མི་ཡི་ལུས་གཅིག་འབག་མི་འདི་ ད་ལྟོ་ཡོད་དོ་བཟུམ་དང་ གསོན་པོ་སྦེ་སྡོད་དོ་བཟུམ་སྦེ་ ལོ་ངོ་༢༠་གི་རྒྱབ་ལུ་ཡང་ སྡོད་ཚུགས་མི་འདི་ དཀོན་སུ་ཅིག་དང་ ངེས་པ་མེད་པའི་ཁར་ ད་ལྟོ་རང་དང་ཡོད་མི་ ཕམ་དང་ཆ་རོགས་འཆམ་མཐུནམ་ གཉེན་དང་བུ་གཞི་ཚུ་ཡང་ ལོག་སྟེ་མ་པ་ལས་འཕྱེད་མ་ཚུགས་པའི་ དུས་ཤར་ནི་འདི་ ལམ་ཐག་རྩ་ལས་མི་རིང་ ཟེར་ཞུ་ནི་ཨིན།
ཕྱིའི་འབྱུང་བ་བཞིའི་ རང་བཞིན་གནས་སྟངས་དང་ དུས་ཚོད་ཚུ་ཡང་ མི་རྟག་པའི་རང་བཞིན་ཨིནམ་མས། ནམ་སོ་ཁའི་དུས་ལུ་ ཤིང་དང་མེ་ཏོག་མཛེས་པའི་ཁར་ བྱ་དང་བྱིའུ་ཅུང་ སེར་སྦྱངམ་ཚུ་ བདེ་བའི་ཟས་ལུ་ལོངས་སྤྱོད་རུང་ ནམ་དགུན་དུས་སྐབས་ ཤིང་དང་མེ་ཏོག་ཚུ་ཡང་བསྐམས་ ཆུ་ཀླུང་འདི་ཚུ་ཡང་ འཁྱེགས་ཀྱིས་བསྡམ་ མཛེས་པའི་ཡུལ་ཚུ་ཡང་ བལྟ་དགོ་མ་བདེ་མ་ཚད་ རིམ་གྱིས་མེདཔ་འགྱོཝ་ཨིན། དེ་བཟུམ་སྦེ་ དུས་ཚོད་ལས་བལྟ་རུང་ མི་རྟག་པའི་ཚུལ་འདིའང་ ཇ་ཕོརཔ་གང་རང་གི་ གདོང་ཁར་བཞག་པ་ཅིན་ ཆུ་ཚོད་གཅིག་དེ་ཅི་ཁར་ ཁོདམ་འགྱོཝ་ལས་ དུས་ཚོད་ལུ་ཡང་ རྟག་པ་གཅིག་ག་ནི་ཡང་མིན་འདུག
རང་ལུ་ལཱ་བཟང་ངན་ ག་ཅི་བཟུམ་བྱུང་རུང་ འདི་ལུ་དགའ་སྐྱོའི་རྟག་པ་མ་བཟུང་བར་ འདི་ལས་ཡོན་ཏན་དང་ མི་རྟག་པའི་ངོ་བོ་ལེན་དགོཔ་དང་ བཤགས་པ་ཕུལ་དགོཔ་ཨིན། རང་གི་ཚེ་གང་ དགའ་ཏོག་ཏོ་སྦེ་སྡོད་རུང་ སྐྱོ་སི་སི་སྦེ་སྡོད་རུང་ ནམ་ཅིག་གི་ཚེ་ འཆི་བདག་གཤིན་རྗེ་ཀྱི་ དབང་དུ་ཐལ་དགོཔ་འདི་ ངེས་བདེན་ཨིནམ་ལས་ རང་དང་གཞན་འཆི་བའི་དུས་ལུ་ མ་ཐལ་པའི་ཧེ་མ་ རང་གི་འཛོལ་བའི་ལཱ་འདི་ བཤགས་པ་ཕུལ་དགོཔ་ཨིན། ད་རིས་རང་གིས་ བཤགས་པ་ཕུལ་མ་ཚུགས་པའི་ཧེ་མ་ བཤགས་པ་ཕུལ་སའི་མི་འདི་ མི་རྟག་པའི་ལམ་དུ་ཐལ་བ་ཅིན་ རང་གིས་བཤགས་པ་ཕུལ་ས་མེད་པའི་ཁར་ རྟིང་ཤུལ་བདའ་བཤགས་པ་ཕུལ་རུང་ ཉན་པ་པོ་མེད་པར་ རང་ཡང་བསམ་པ་མི་རྫོགས། དེ་མ་ཚད་ བཤགས་པ་ཕུལ་མ་ཚུགས་པའི་ཧེ་མ་ རང་དུས་ཚོད་བཞི་པ་ལུ་ཐལ་སོང་པ་ཅིན་ འདི་བ་ལྷག་པའི་ བློ་འགྱོད་ཤོས་མེདཔ་ཨིན།
མི་ཚེ་འདི་རྟག་པ་མེད་པའི་ རྨི་ལམ་དང་འདྲཝ་ལས་ འདི་ལུ་སེམས་བག་ཡེངས་ཤོར་ཏེ་ མི་ཚེ་སྟོང་ལོག་མེདཔ་ཅིག་འབད་དགོ རང་ལུ་ངན་པའི་དུས་ ག་ཅི་བཟུམ་ཤར་ཏེ་ཡོད་རུང་ འདི་ཚུ་ཡོན་ཏན་དང་བཅསཔ་སྦེ་ སེམས་ལས་བརྗེད་དེ་ མི་ཚེ་ལྷག་ལུས་འདི་ དམ་པའི་ཆོས་དང་མཐུནམ་སྦེ་འབད་བ་ཅིན་ རང་ལུ་མི་རྟག་པའི་དུས་ བརྒྱ་སྟོང་སྦེ་འོང་སྟེ་ རང་གི་གདོང་ཁར་ འཇིགས་སྐྲག་སྟོན་རུང་ འདི་ལུ་འདྲོག་འབྱེལ་མེད་པའི་ སེམས་ཤུགས་ཐོབ་ཨིནམ་མས།
འབྱུང་བ་བཞིའི་རང་དབང་ཐོབ་མི་དང་ ཚེའི་དངོས་གྲུབ་ཐོབ་མི་ཚུ་ཡང་ ད་ལྟོ་མཚན་ཙམ་ལས་གོ་བའི་ དུས་བསྐལ་མེད་པ་ཅིན་ མི་གཙང་བ་དང་ ཉོན་མོངས་པ་དུག་གསུམ་གྱིས་གང་མི་ ང་བཅས་ཀྱི་ལུས་འདི་ ནམ་འཆི་ཆ་མེད་ཀྱི་མི་ཚེ་འདི་ རྟག་པ་རྩ་ལས་མེདཔ་ཨིན། འདི་འབདཝ་ལས་ ད་རིས་ཕྱི་རུ་ཉལ་བའི་ལུས་འདི་ ནངས་པ་རོ་སྦེ་ལུས་པ་ཅིན་ འདི་ལུ་བལྟ་སྟེ་ རང་གི་ཡིད་རྣམ་པར་ཤེས་པ་འདི་ཡང་ བར་དོའི་གནས་ནང་ བློ་དགྱོད་དང་སྡུག་བསྔལ་མེད་པའི་ ཐབས་ལམ་འདི་ཚུ་ ད་ལྟོ་ལུས་དང་སེམས་ལུ་ རྐྱེན་མ་ཕོག་པའི་ཧེ་མ་ ལུས་ངག་ཡིད་གསུམ་གྱི་སྤྱོད་ལམ་འདི་ དུས་རྒྱུན་དུ་དམ་པའི་ཆོས་དང་མཐུན་དགོཔ་ཨིན། དེ་མ་ཚད་ འཇིག་རྟེན་རྨི་ལམ་གྱི་མི་ཚེ་འདི་ མི་རྟག་པའི་ལམ་དུ་ མ་ཐལ་བའི་སྔོན་མ་ བཤགས་པ་ཕུལ་ཏེ་ ཡོན་ཏན་ལེན་དགོཔ་དང་ མི་ཚེ་བདེན་ཡོདཔ་བཟོ་དགོཔ་ཨིན་ནོ།།
Comments
Post a Comment