དབུ་ཞྭ་བྱ་རོག་གདོང་ཅན།

 དབུ་ཞྭ་བྱ་རོག་གདོང་ཅན་གྱི་བརྡ་དོན་འགྲེལ་བཤད།

 ༡༽ སྤྱིར་བཏང་བྱ་རོག་འདི་གི་ སྤུ་མདོག་ནགཔོ་ཨིན་རུང་ དབུ་ཞྭ་འདི་གི་མདོག་མཐིང་ནག་གམ་ ལྗང་ནག་ཡོད་མི་འདི་ རང་བཞིན་གྱི་ལྗོན་ཤིང་དང་ སྔོ་ཚལ་མཛེས་པའི་ནོར་གྱིས་ཕྱུག་པའི་ འབྲུག་རྒྱལ་ཁབ་འདི་ དཔལ་ཡེ་ཤེས་མགོན་པོའི་གདུལ་ཞིང་མཐུན་མོང་མ་ཡིན་པ་འདི་ བྱང་ཆུབ་སེམས་དཔའི་སྤྲུལ་པ་ ཆོས་རྒྱལ་རིམ་བྱོན་གྱིས་ སྐྱོང་བའི་བརྡ་ཨིན།

 ༢༽ དབུ་ཞྭ་ལུ་སྤྱན་གསུམ་ཡོད་མི་དེ་ དད་པ་དང་དམ་ཚིག་ལྡན་པའི་མི་དེ་ཚུ་ལུ་ ཡེ་ཤེས་པའི་ལྷ་ཚུ་གིས་ ཉིན་མཚན་དུས་དྲུག་གཡེལ་བ་མེད་པར་གཟིགས་ཏེ་ སྲུང་སྐྱོབས་མཛད་གནངམ་བཞིན་དུ་ འབྲུག་བརྒྱུད་འཛིན་རྒྱལ་པོ་ཚུ་གིས་ཡང་ དད་འབངས་ཚུ་ལུ་ ཐུགས་བརྩེ་བ་ཆེན་པོ་གིས་ དུས་རྒྱུན་དུ་གཟིགས་པའི་བརྡ་ཨིན།

༣༽ དབུ་ཞྭ་ལུ་ བྱ་ཁྱུང་གི་གཟུགས་བརྙན་གྱི་རི་མོ་ཡོད་མི་འདི་ སངས་རྒྱས་ཀྱི་ཐུགས་ཀྱི་སྤྲུལ་པ་ བྱ་ཁྱུང་འདི་གིས་ ཀླུ་གདུག་པ་ཅན་དེ་ཚུ་བཏུལ་ཏེ་ འཇིག་རྟེན་གྱི་ཁམས་ བདེ་བར་བཀོད་གནངམ་བཞིན་དུ་ འབྲུག་རྒྱལ་པོ་རིམ་བྱོན་ཚུ་གིས་ཡང་ འབངས་མི་སེར་ཚུ་ ཞི་རྒྱས་དབང་དྲག་གི་ ཕྲིན་ལས་བཞིའི་སྒོ་ནས་ བདེ་བར་སྐྱོང་བའི་བརྡ་ཨིན།

 ༤༽ བྱ་རོག་གི་མགུ་ཏོག་ལུ་ གཙུག་ཕུད་མེད་དེ་འབད་རུང་ ཉི་མ་དང་ཟླཝ་གསེར་གྱི་ཏོག་བཅས་ གཙུག་ཕུད་ཡོད་མི་དེ་ འབྲུག་རྒྱལ་པོ་རིམ་བྱོན་གྱིས་ ཆོས་སྲིད་ལུགས་གཉིས་ཀྱི་ དཔལ་བཟང་པོ་ ཉི་ཟླའི་སྣང་བ་བཞིན་དུ་ ཕྱོགས་མཐར་སྤེལ་བའི་བརྡ་དང་ཡང་ན་ འབྲུག་རྒྱལ་ཁབ་ནང་ལུ་ བཀའ་རྙིང་ཟུང་འབྲེལ་གྱི་བསྟན་པ་སྐྱོང་བའི་བརྡ་ཨིན། གསེར་གྱི་ཏོག་ཡོད་མི་དེ་ སྲིད་ཞི་ལེགས་ཚོགས་ཀྱི་ དཔལ་ཕུན་སུམ་ཚོགསཔ་ག་ར་འབྱུང་སའི་གཞི་ སངས་རྒྱས་ཀྱི་བསྟན་པ་གཅིག་ལུ་ རག་ལསཔ་བཞིན་དུ་ འབྲུག་རྒྱལ་ཁབ་འདི་ནང་གི་ འབངས་མི་སེར་ཚུ་གི་སྐྱིད་སྡུག་ཞུ་སར་ འབྲུག་རྒྱལ་པོའི་གཅིག་ལུ་ གཏད་པའི་བརྡ་དང་ འབྲུག་རྒྱལ་བརྒྱུད་འཛིན་པའི་རིང་ལུགས་འདི་ གོང་དུ་བཀུར་ཏེ་ འགྱུར་བ་མེད་པར་བསྟེན་པའི་བརྡ་ཨིན།

 ༥༽ དབུ་ཞྭའི་བྱ་རོག་གི་ཁ་བརྒྱངས་ཏེ་ཡོད་མི་དེ་ དཔལ་ཡེ་ཤེས་མགོན་པོའི་སྡོང་གྲོགས་ལུ་བརྟེན་ཏེ་     རང་དབང་རང་བཙན་གྱི་འབྲུག་རྒྱལ་ཁབ་ཀྱི་ གཏམ་སྙན་གྲགས་དང་ རྒྱལ་ཁབ་འདི་གི་    འབངས་མི་སེར་གྱི་ བདེ་ཐབས་ཁོ་ན་ལུ་བརྩོན་མི་ ཐུགས་བསྐྱེད་དང་མཛད་རྒྱ་བཀྲ་བའི་    འབྲུག་བརྒྱུད་འཛིན་གྱི་རྒྱལ་པོ་རིམ་བྱོན་ཚུ་གི་ མཚད་བཟང་པོའི་སྙན་གྲགས་དེ་ འཛམ་གླིང་རྒྱལ་ཡོངས་ནང་ཁྱབ་ནིའི་བརྡ་མཚོན་ཨིན་ནོ།།