ཆང་དང་ཏམ་ཁུ་སྤང་དགོ་པའི་སྐོར།
འབྲུག་ཆོས་དང་ལྡན་པའི་ རྒྱལ་ཁབ་ནང་ དལ་བ་བརྒྱད་དང་ འབྱོར་པ་བཅུ་ཚང་བའི་ མི་ལུས་རིན་པོ་ཆེའི་ ལུས་ལེན་མི་འདི་ ཡ་མཚན་ཅན་དང་ སྐལ་བ་བཟང་ཤོས་ཅིག་ཨིན། དེའི་ནང་ལས་ཡང་ འབྲུག་ཆོས་དང་ལྡན་པའི་ རྒྱལ་ཁབ་ནང་ འབྲུག་མི་ག་ར་ སྤྱིར་ཨྱོན་གུ་རུའི་ལུང་བསྟན་དང་ ཞབས་དྲུང་ངག་དབང་རྣམ་རྒྱལ་གྱིས་ ཐུགས་སྨོན་ལས་ གངས་བར་ནང་གི་ཆུ་འཐུང་ སྤྲིན་པར་ནང་གི་ཉིམ་བསྲོ་སྟེ་ ལྷ་ཆོས་དགེ་བ་བཅུ་ གྲུབ་ནི་ལུ་བརྩོན་ཤུགས་བསྐྱེད་མི་ བསམ་གྱིས་མ་ཁྱབ་པར་ཡོདཔ་ཨིན། ཨིན་རུང་ ད་རིས་ནངས་པ་ དུས་ཀྱི་འགྱུར་བ་དང་བསྟུན་ ཟས་ངན་ཆང་དང་གཏམ་ཁུ་ལུ་ ལོངས་སྤྱོད་མི་ འཐོན་དོ་ཡོདཔ་ལས་ ཟས་ངན་འདི་ ཆོས་དང་འཇིག་རྟེན་གཉིས་ལས་འབད་རུང་ མ་པ་ལས་མ་བཏུབ་པའི་ ལཱ་གཅིག་ཨིན།ཟས་ངན་ཆང་དང་གཏམ་ཁུ་འདི་ རྒས་གཞོན་བར་མ་ ག་གིས་རང་སྤྱོད་དོ་ཡོདཔ་ལས་ རྒྱལ་ཁབ་ནང་ ནག་ཚོང་ཐབས་མི་ཡང་ ལེ་ཤ་རང་འཐོན་དོ་ཡོདཔ་ཨིན། འདི་ནང་ལས་ཡང་ ན་གཞོན་ཨ་ལོ་ཚུ་གིས་ ལོ་ན་ཆུང་ཀུ་བསྒང་ལས་རང་ ཆང་དང་ཏམ་ཁུ་ལུ་ ལོངས་སྤྱོད་ལང་ཤོར་ཐལ་བ་ཅིན་ མི་ཚེ་ནང་ རང་གི་མགུ་ཏོག་རང་གིས་འཐུ་སྟེ་ སྡོད་ཚུགས་པ་ ལཱ་ཁག་ཡོད་པའི་ཁར་ མི་སྡེ་ནང་འབད་རུང་ ཁ་གཏང་པའི་གཞི་དང་ སྨད་པ་རྐྱབ་པའི་ གཞི་ཅིག་ལུ་འགྱུར་ནི་ཨིན།
སེམས་ཁམས་འཁྲུགས་ཟས་ ཆང་དང་ཏམ་ཁུ་འདི་ གཉིས་ལས་ ང་པ་ཆང་གི་གནོད་འདི་ཞུ་བ་ཅིན་ ཆང་ལས་རྟེན་ བཟའ་ཚང་ནང་མ་མཆམ་པའི་ཁར་ བར་ན་ལས་ ཨ་ལོ་ཚུ་ཡང་མེདཔ་ཐལཝ་ཨིན། དེ་མ་ཚད་ དྲན་པ་ཉམས་པའི་རྒྱུ་ཡང་ཨིནམ་ལས་ ཆང་འཐུང་པའི་ཤུལ་ལས་ གཏམ་ཡར་ཡར་འཐེན་ ཁྲལ་དང་ངོ་ཚ་མེད་པའི་ ལཱ་ཡང་ལེ་ཤ་འབད་དེ་ མི་དང་མི་གི་བར་ན་ བདེ་བ་ཡང་མེདཔ་གཏང་པའི་ཁར་ སྟབས་མ་བདེཝ་ དཔེར་ན་ ཤི་རྐྱེན་རྨ་རྐྱེན་ཡང་ བྱུང་དང་འབྱུང་བཞིན་དུ་ཡོདཔ་ཨིན། དེ་བཟུམ་སྦེ་རང་ སློབ་ཕྲུག་ན་གཞོན་ཚུ་ ཆང་འཐུང་པ་ཅིན་ ལོ་གཞོནམ་འབདཝ་ལས་ འཐབ་འཛིན་ཚུ་ཡང་ འབད་དོ་ཡོད་པའི་ཁར་ སློབ་གྲྭ་ནང་དུས་ཚོད་ཁར་ འོང་མ་ཚུགས་ ཕམ་དང་སློབ་དཔོན་ཚུ་ངོ་རྒོལ་འབད་དེ་ བློ་འཁོལ་སི་སི་གི་ལཱ་ ལེ་ཤ་རང་འབད་བའི་ཤུལ་ལས་ ཆོས་རྒྱུགས་ནང་མཐར་འཁྱོལ་མ་ཚུགས་པར་ མི་ཚེ་མེདཔ་འགྱོ་མི་ཡང་ ལེ་ཤ་རང་ཡོདཔ་ཨིན།
གཉིས་པ་ ཟས་ངན་ཏམ་ཁུ་གི་ གནོད་པ་ག་དེ་སྦེ་རང་ ཡོད་ག་ཟེར་བ་ཅིན་ ཏམ་ཁུ་འདི་ཆོས་དང་འཇིག་རྟེན་གཉིས་ལས་ མ་བཏུབ་པའི་ཟས་ངན་སྡིག་ཅན་ཨིན་ཟེར་ ཨྱོན་གུ་རུ་རིན་པོ་ཆེ་གིས་ གསུངས་པའི་ཁར་ ཏམ་ཁུ་ལས་རྟེན་པའི་ ནད་གཞི་ཡང་ལེ་ཤ་ཐོབ་ཨིན། ཏམ་ཁུ་གིས་རང་གི་གཟུགས་ཁར་ གནོད་པ་གིས་མ་ཚད་ དེའི་མཐའ་འཁོར་ལུ་ཡོད་པའི་ མི་དང་སེམས་ཅན་ལུ་ཡང་གནོད་པའི་ཁར་ རང་བཞིན་གནས་སྟངས་ཡང་ མེདཔ་གཏངམ་ཨིན།
དེ་འབདཝ་ལས་ ད་ལྟོ་ལ་མ་བརྒལ་ལབ་རྩའི་སྦུག་དང་ ཆུ་མ་བརྒལ་ཟམ་པའི་སྦུག་འབདཝ་ལས་ བཅོས་ཐབས་ཡོད་པའི་ཁར་ ད་ལྟོ་ཚུན་ ཟས་ངན་སྤྱོད་དེ་ཡོད་པ་ཅིན་ གཤགས་པ་ཕུལ་ནི་དང་ ད་ལས་ཕར་ ཟས་ངན་ ཆང་དང་ཏམ་ཁུ་འདི་ མ་པ་ལས་ལོངས་མི་སྤྱོད་ཟེར་ ཁས་བླངས་འབད་དགོཔ་ཨིན། དེ་སྦེ་ འབད་བ་ཅིན་ སངས་རྒྱས་ཀྱི་ཆོས་དང་ མི་སྡེའི་ནང་ཕན་ཐོགས་པའི་ ལཱ་ཟེར་རུང་ འདི་རང་ཨིན་ཟེར་ཞུ་ནི་ཨིན།
Comments
Post a Comment