✍ ༄༅། ། རྟགས་འཇུག་གི་སྙིང་པོ་དཀའ་གནད་གསལ་བའི་མེ་ལོང་ཞེས་བྱ་བ་བཞུགས་སོ།།
ན་མོ་མཉྫུ་ཤྲི་ཡེ། རྒྱལ་ཀུན་མཁྱེན་པའི་ཡེ་ཤེས་དཔྱིད།། གཞོན་ནུའི་གཟུགས་ཀྱིས་རྣམ་རོལ་བ།། རྗེ་བཙུན་བརྟན་པའི་འཁོར་ལོ་དང༌།། དབྱེར་མེད་བླ་མའི་ཞབས་བཏུད་ནས།། མཁས་མཆོག་ཐོན་མིའི་ཐུགས་མཚོ་ལས།། བྱུང་བའི་བརྡ་སྤྲོད་ཕྱི་མོ་མཆོག། རྟགས་ཀྱི་འཇུག་པའི་སྙིང་པོའི་དོན།། མདོར་བསྡུས་ཚིག་གིས་གསལ་བར་བྱ།། སྤྱིར་ན་དབྱངས་མོ་གསལ་བྱེད་ཕོ།།དེ་ཕྱིར་ཀ་ལི་སུམ་ཅུ་པོ།། ཕོ་ཡི་ཡི་གེ་འབའ་ཞིག་ལ།། ནང་གསེས་སྡེ་ཚན་ལྔར་དབྱེ་སྟེ།། ཀ་ཅ་ཏ་པ་ཙ་རྣམས་ཕོ།། ཁ་ཆ་ཐ་ཕ་ཚ་མ་ནིང༌།། ག་ཇ་ད་བ་ཛ་ཝ་ཞ།། ཟ་འ་ཡ་ཤ་ས་རྣམས་མོ།། ང་ཉ་ན་མ་ཤིན་ཏུ་མོ།། ར་ལ་ཧ་ཨ་མོ་གཤམ་སྟེ།། ཨ་ནི་མཚན་མེད་ཅེས་ཀྱང་བྱ།། སྔོན་འཇུག་ལྔ་ཡི་བ་ཡིག་ཕོ།། ག་ད་མ་ནིང་འ་མོ་ཡིག། མ་ནི་ཤིན་ཏུ་མོ་ཡིན་ནོ།། དེ་རྣམས་གང་ལ་གང་འཇུག་ན།། ཕོ་ཡིག་བ་ནི་ཀ་ཅ་ཏ།། ཙ་ག་ང་ཇ་ཉ་ད་ན།། ཛ་ཞ་ཟ་ར་ཤ་སར་འཇུག། མ་ནིང་ག་ནི་ཅ་ཏ་ཙ།། ཉ་ད་ན་ཞ་ཟ་ཡ་ཤ། སར་འཇུག་མ་ནིང་ད་ཡིག་ནི།། ཀ་པ་ག་བ་ང་མར་འཇུག། མོ་ཡིག་འ་ནི་ག་ཇ་ད།།བ་ཛ་ཁ་ཆ་ཐ་ཕ་ཚར།། ཤིན་ཏུ་མོ་ཡི་མ་ཡིག་ནི།། ཁ་ཆ་ཐ་ཚ་ག་ཇ་ད།། ཛ་ང་ཉ་ན་རྣམས་ལ་འཇུག། ཇི་ལྟར་འཇུག་པར་བྱེད་ཅེ་ན།། ཕོ་ནི་སྒྲ་རྩོལ་དྲག་པར་འཇུག། མ་ནིང་རན་པར་འཇུག་པ་ཡིན།། མོ་ནི་ཞན་པའི་ཚུལ་གྱིས་ཏེ།། ཤིན་ཏུ་མོ་ནི་མཉམ་པས་སོ།། ཅི་ཕྱིར་འཇུག་པར་བྱེད་ཅེ་ན།། ཐོག་མར་འདི་ལྟར་ཤེས་དགོས་ཏེ།། ལས་གང་ཞིག་ལ་བྱེད་པ་པོ།། གཞན་དང་དངོས་སུ་འབྲེལ་བ་ཡི།། དབང་དུ་བྱས་ནས་བྱེད་པོ་དང༌།། དེ་ཡི་བྱེད་པ་གཉིས་པོ་ནི།། དངོས་པོ་བདག་ཡིན་བྱ་ཡུལ་དང༌།། བྱ་བ་གཉིས་པོ་དངོས་པོ་གཞན།། དེ་བཞིན་བྱེད་པ་པོ་གཞན་དང༌།། དངོས་སུ་འབྲེལ་མིན་ཇི་ལྟར་ཡང༌།། བྱ་བ་བྱས་ཟིན་འདས་པ་དང༌།། བྱ་བ་བྱེད་འགྱུར་མ་འོངས་དང༌།། བྱེད་བཞིན་པ་ནི་ད་ལྟ་བ།། དེ་ཕྱིར་དུས་གསུམ་དབྱེ་བས་ནི།། བྱེད་ལས་དང་འབྲེལ་ངག་གི་ནི།། སྦྱོར་བ་ཀུན་ལ་ཁྱབ་པ་ཡིན།། བདག་གཞན་དབྱེ་བས་དེ་ཙམ་དུ།། ཁྱབ་པ་མིན་ཡང་བྱེད་པོ་དང༌།། བྱ་ཡུལ་བསྡུ་ཕྱིར་དབྱེ་བ་དེ།། མཛད་ནས་བདག་གཞན་དང་འབྲེལ་བའི།། བྱ་བྱེད་རྣམས་ཀྱང་དེ་ཁོངས་བསྡུས།། དེས་ན་དུས་གསུམ་དུ་དབྱེ་བས།། བདག་གཞན་དབྱེ་བས་མ་ཁྱབ་པ།། བསྡུ་བའི་དོན་དུ་ཤེས་དགོས་པར།། གསུངས་ཀྱང་སྔོན་འཇུག་འ་ཡིག་སྐབས།། བྱེད་ལས་ཙམ་དང་འབྲེལ་བ་ཡི།། དངོས་པོ་བདག་ལའང་འཇུག་པ་མཐོང༌།། དེ་ལྟར་ངེས་ནས་ཕོ་ཡིག་བ།། བསྒྲུབས་སོ་ལྟ་བུ་འདས་པ་དང༌།། བསྒྲུབ་བྱའི་ལྷ་དང་བསྒྲུབ་པར་བྱ།། ཞེས་སོགས་དངོས་པོ་གཞན་ལ་འཇུག། མ་ནིང་ག་ད་གཉིས་པོ་ནི།། གཅོད་པ་པོ་དང་གཅོད་པར་བྱེད།། གཅོད་པར་འགྱུར་དང་དཀྲི་བ་པོ།། དཀྲི་བར་བྱེད་དང་དཀྲི་བར་འགྱུར།། ཞེས་སོགས་དངོས་པོ་བདག་དོན་དང༌།། གཅད་བྱའི་ཤིང་དང་གཅད་པར་བྱ།། དཀྲི་བྱའི་སྣལ་མ་དཀྲི་བར་བྱ།། ཞེས་སོགས་དངོས་པོ་གཞན་དོན་དང༌།། གཅོད་བཞིན་པ་དང་དཀྲི་བཞིན་པ།། ཞེས་སོགས་ད་ལྟ་བསྒྲུབ་ཆེད་འཇུག། མོ་ཡིག་འ་ནི་འཆད་པ་པོ།། འཆད་པར་བྱེད་དང་འཆད་པར་འགྱུར།། ཞེས་སོགས་དངོས་པོ་བདག་དངོས་དང༌།། འགྲོ་བ་པོ་དང་འགྲོ་བར་བྱེད།། ཅེས་སོགས་བདག་དོན་ཕལ་བ་དང༌།། འཁྱིལ་ལོ་ཞེས་སོགས་ད་ལྟ་དང༌།། འཁྱིལ་བར་འགྱུར་སོགས་མ་འོངས་འཇུག། ཤིན་ཏུ་མོ་ཡི་མ་ཡིག་ནི།། བདག་གཞན་དུས་གསུམ་མཉམ་པར་འཇུག། འོན་ཀྱང་བྱེད་པོ་གཞན་དངོས་དང༌།། འབྲེལ་བའི་འདས་ལ་འའི་སྔོན་འཇུག། མེད་པར་ངེས་ཤིང་ག་ད་ཉུང༌།། ད་ལྟ་བ་ལ་བའི་སྔོན་འཇུག། ཉུང་ཞིང་མགོ་ཅན་ད་ལྟ་བར།། བས་འཕུལ་མེད་པར་ངེས་པར་ཙམ།། གཞན་ཡང་བས་འཕུལ་ཅན་ཕལ་ཆེར།། བྱེད་པ་པོ་ནི་ད་ལྟ་དང༌།། བྱ་ཡུལ་མ་འོངས་པར་བསྡུས་ནས།། འདས་ལ་བས་འཕུལ་ཡང་འཇུག་ཡོད།། ད་ལྟ་བ་ལ་གཉིས་ཀ་མེད།། མ་འོངས་འཕུལ་ཡོད་ཡང་འཇུག་མེད།། བསྐུལ་ཚིག་འཕུལ་མེད་ཡང་འཇུག་ཡོད།། སྐབས་འགར་འདས་དང་བསྐུལ་ཚིག་ལ།། ས་རྐྱང་སྦྱར་བས་འཐུས་པའང་ཡོད།། རྗེས་འཇུག་ཡི་གེ་བཅུ་པོ་ཡི།། ག་ད་བ་ས་བཞི་རྣམས་ཕོ།། ང་མ་འ་གསུམ་མོ་ཡིན་ཅིང༌།། ན་ར་ལ་གསུམ་མ་ནིང་སྟེ།། མིང་གཞིའི་ཡི་གེ་ཀུན་ལ་འཇུག། ཇི་ལྟར་འཇུག་ཚུལ་གཉིས་ཡིན་ཏེ།། དང་པོ་སྒྲ་ཡི་འཇུག་ཚུལ་ནི།། ཕོ་ཡི་ག་ཡིག་ཡང་འཇུག་ཅན།། སྐྱེས་བུ་རབ་དང་ཕོ་ཡིག་བ།། ཡངའཇུག་ཅན་ནི་སྐྱེས་བུ་འབྲིང༌།། ག་བ་ཡང་འཇུག་མེད་པ་དང༌།། ད་སའི་མཐའ་ཅན་ཐ་མ་སྟེ།། དྲག་པ་ཕོ་ལའང་ནང་གསེས་ཀྱིས།། དྲག་ཞན་བར་མ་གསུམ་དུ་དབྱེ།། དེ་བཞིན་ཞན་པ་མོ་ལ་ཡང༌། ནང་གསེས་དྲག་ཞན་གཉིས་དབྱེ་སྟེ།། ང་མ་ཡང་འཇུག་ཅན་མོ་དང༌།། ང་མ་ཡང་འཇུག་མེད་པ་དང༌།། འ་མཐའ་ཅན་རྣམས་ཤིན་ཏུ་མོ།། བར་མ་མ་ནིང་ན་ར་ལ།། ཡང་འཇུག་ཡོད་དམ་མེད་ཀྱང་རུང༌།། མིང་གཞི་ཕོ་ཡིག་མཐར་ཡོད་དང༌།། མིང་གཞི་མ་ནིང་རྗེས་སུ་ནི།།ཡང་འཇུག་དང་བཅས་ཞུགས་པ་ན།། དྲག་དང་ཕྲད་པས་དྲག་པར་འགྱུར།། མིང་གཞི་མོ་ཡིག་རྗེས་སུ་ནི།། ཡང་འཇུག་མེད་པར་ཞུགས་པ་ན།། ཞན་དང་ཕྲད་པས་ཞན་པར་འགྱུར།། དེ་གཉིས་འགྱུར་བ་མ་ནིང་ཡིན།། མིང་གཞི་མོ་ཡིག་རྗེས་སུ་ནི།། ཡང་འཇུག་དང་བཅས་ཞུགས་པ་ན།། དྲག་ཞན་གཉིས་ཀའི་ཆ་ལྡན་ཕྱིར།། མཚན་གཉིས་མ་ནིང་ཞེས་སུ་གྲགས།། མིང་གཞི་མ་ནིང་རྗེས་སུ་ནི།། ཡང་འཇུག་མེད་པར་ཞུགས་པ་ན།། དྲག་ཞན་གང་དུའང་མི་འགྱུར་བས།། མཚན་མེད་མ་ནིང་ཞེས་སུ་འདོད།། གཉིས་པ་དོན་ལ་གཉིས་ཡོད་པའི།། སྔ་མ་གང་ལྟར་འགྱུར་བ་ནི།། རྗེས་འཇུག་གང་ལ་ཞུགས་པ་ཡི།། མིང་དེས་བདག་གཞན་སོགས་གང་སྟོན།། ཕལ་ཆེར་མིང་དེའི་སྔོན་འཇུག་གི། ནུས་པར་སྦྱར་ནས་རྟོགས་པར་བྱ།། ཕྱི་མ་ཇི་ལྟར་འགྱུར་བ་ནི།། རྗེས་འཇུག་ཕོ་ཡིས་ཕོ་ཡིག་གི། མིང་མཐའ་གཞན་དྲངས་དེ་བཞིན་དུ།། མོ་ཡིས་མོ་ཡི་མིང་མཐའ་དང༌།། མ་ནིང་གིས་ནི་མ་ནིང་དྲང༌།། དེ་རྣམས་རྟགས་མཚུངས་འདྲེན་ཚུལ་ཏེ།། བརྗོད་བདེ་འདྲེན་པའང་ཤིན་ཏུ་མང༌།། གཞན་ཡང་མིང་མཐའ་དེ་ཉིད་ཀྱིས།། རྟགས་མཚུངས་པའམ་སྒྲ་མཐུན་པར།། རྣམ་དབྱེ་བརྒྱད་དང་སླར་བསྡུ་སོགས།། སྔ་མའི་ཤུགས་དང་མཐུན་པའི་འདྲེན།། དེ་དག་ནང་གསེས་གང་འཇུག་ནི།། རྣམ་དབྱེའམ་འཕྲད་བཅས་མིང་ཚིག་དེའི།། མཐར་སྦྱར་མིང་དོན་ལས་ཤེས་བྱ།། དེ་ཡང་ཆོས་རྣམས་ངོ་བོ་ཙམ།། བརྗོད་པ་རྣམ་དབྱེ་དང་པོ་སྟེ།། དཔེར་ན་བུམ་པ་ཀ་བ་བཞིན།། གསལ་བྱེད་བོད་ཀྱི་སྐད་ལ་ཉུང༌།། ལས་དང་བྱ་ཡུལ་དོན་གཅིག་སྟེ།། དེ་ལྟའི་བྱ་བའི་ཡུལ་ཞིག་ལ།། བྱ་བ་བྱས་པར་སྟོན་པ་ལ།། གཉིས་པ་ལས་སུ་བྱ་བ་དང༌།། གཉིས་པའི་ནང་ཚན་དེ་ཉིད་དང༌།། བཞི་བ་དགོས་ཆེད་གསུམ་འདྲ་ཡང༌།། བྱ་བ་བྱས་པས་བྱ་བའི་ཡུལ།། དེ་འམ་དེ་དང་འབྲེལ་བ་ལ།། ཕན་ཐོགས་མེད་ན་གཉིས་པ་སྟེ།། དཔེར་ན་ཤར་དུ་འགྲོ་ལྟ་བུ།། ཕན་ཐོགས་ཡོད་ན་བཞི་པ་སྟེ།། དཔེར་ན་སློང་ལ་སྦྱིན་ལྟ་བུ།། ཕན་ཐོགས་མེད་ཀྱང་བྱ་ཡུལ་དང༌།། བྱ་བ་ངོ་བོ་གཅིག་ཡིན་ན།། གཉིས་པའི་ནང་ཚན་དེ་ཉིད་དེ།། དཔེར་ན་ལྷ་རུ་གསལ་ལྟ་བུ།། གང་ཞིག་གང་ལ་བརྟེན་པ་འམ།། གནས་དང་ཡོད་པའི་དོན་ཙམ་ལས།། བྱ་བ་གཏན་ནས་མི་བྱེད་ན།། རྣམ་དབྱེ་བདུན་པ་གནས་གཞི་སྟེ།། དཔེར་ན་སྟེང་དུ་མི་ཡོད་ལྟར།། ཚེ་སྐབས་གཉིས་དང་དོན་འདྲ་ན།། བདུན་པའི་ནང་ཚན་ཚེ་སྐབས་ཏེ།། དཔེར་ན་མཆུ་ཟླ་ཤར་བ་ན།། ཆོ་འཕྲུལ་དུས་ཆེན་ཚུགས་ལྟ་བུ།། རྣམ་དབྱེ་གཉིས་བཞི་བདུན་པ་དང༌།། དེ་ཉིད་ཚེ་སྐབས་གསལ་བྱེད་སྒྲ། སུ་ར་རུ་དུ་ན་ལ་ཏུ།། ཡིན་ཞིང་ཕལ་ཆེར་ལ་སྒྲ་དང༌།། མཐུན་པས་ལ་དོན་རྣམ་དབྱེའང་ཟེར།། འོན་ཀྱང་ན་ལ་དེ་ཉིད་ལ།། མི་འཇུག་སྨྲ་བའི་སྒོ་ལས་གསུངས།། རྣམ་དབྱེ་གང་ལ་སྦྱོར་ཡུལ་དེས།། ཉེ་འགྱངས་གང་དུ་བྱ་བ་ཞིག། བྱས་ན་གསུམ་པ་བྱེད་སྒྲ་སྟེ།། དཔེར་ན་བདག་གིས་བཤད་ལྟ་བུ།། བྱ་བ་གཏན་ནས་མི་བྱེད་པར།། སྔ་ཕྱི་འབྲེལ་བྱེད་ཙམ་སྟོན་ན།། རྣམ་དབྱེ་དྲུག་པ་འབྲེལ་སྒྲ་སྟེ།། དཔེར་ན་བདག་གི་མིག་ལྟ་བུ།། རྣམ་དབྱེ་གསུམ་དྲུག་གསལ་བྱེད་སྒྲ།། ས་མཐའ་ཡོད་དང་མེད་པ་ཡི།། གི་ཀྱི་གྱི་འི་ཡི་ལྔ་ཡིན།། གང་ཞིག་གང་ལས་བྱུང་བ་འམ།། བྱེ་དང་ལྷུང་བའི་དོན་ལྡན་ན།། རྣམ་དབྱེ་ལྔ་པ་འབྱུང་ཁུངས་ཏེ།། དཔེར་ན་ཞལ་ནས་ཐོས་ལྟ་བུ།། གསལ་བྱེད་སྒྲ་ནི་ནས་ལས་ཏེ།། དགར་དང་སྡུད་པའང་ལྔ་པར་གཏོགས།། གཞན་ཡང་ཚིག་དོན་གོང་འོག་ཏུ།། བསྡུ་རྒྱུ་ཡོད་ན་སྡུད་པའི་སྒྲ།། དང་དང་ཀྱང་ཡང་འང་སོགས་སྦྱོར།། རྣམ་གྲངས་དུ་མས་དོན་བསྐྱར་ན།། འབྱེད་སྡུད་སྒྲ་འཇུག་དགག་པ་དང༌།། བདག་དོན་ཡོད་ན་ཐོག་མཐའ་རུ།། པ་སྡེའི་རྟགས་རྣམས་ཅི་རིགས་འཇུག། རྒྱན་དུ་གྱུར་པའི་ཚིག་ཕྲད་ཀྱང༌།། དོན་ལ་བསྙེགས་པ་ཡོད་ན་སྦྱོར།། དེ་བཞིན་བསྟན་བྱ་ལྷག་ཡོད་ན།། ལྷག་བཅས་སྒྲ་སྦྱོར་ཚིག་དོན་ནི།། རྫོགས་ན་སླར་བསྡུའི་སྒྲ་རྣམས་སྦྱོར།། དགོས་པ་ཅི་ཕྱིར་འཇུག་ཅེ་ན།། མོ་ཡིག་དབྱངས་དང་མི་ལྡན་ན།། ཕོ་ཡིག་གསལ་བྱེད་བརྗོད་མི་ནུས།། དེ་ཕྱིར་དབྱངས་ལྔར་བཞེད་པ་བདེ།། ཕོ་ཡིག་དབྱངས་ལྡན་དེ་དག་ལའང༌།། རྗེས་འཇུག་བཅུ་པོ་མ་ཞུགས་ན།། དོན་གྱི་ངོ་བོ་ཙམ་སྟོན་པའི།། མིང་དང་དོན་གྱི་ཁྱད་པར་རྣམས།། སྟོན་པའི་ཚིག་དང་དོན་ལྡན་པའི།། ངག་གི་བརྗོད་པ་ཡོད་མིན་ཏེ།། ཡི་གེའི་ཁོངས་ནས་མིང་དབྱུང་ཞིང༌།། མིང་གི་ཁོངས་ནས་ཚིག་ཕྱུང་ནས།། ཚིག་གིས་དོན་རྣམས་སྟོན་པས་སོ།། མིང་ཚིག་བརྗོད་པ་མེད་ན་ནི།། མཐུན་མོང་མཐུན་མོང་མ་ཡིན་པའི།། ཤེས་བྱ་སྟོན་པའང་མེད་པར་འགྱུར།། དེ་ཕྱིར་འཕགས་ཡུལ་མཁས་རྣམས་ཀྱི།།རྗེས་སུ་འབྲངས་ནས་གསུངས་པ་འདི།། སྐྱེ་བོ་ཀུན་གྱིས་རྟོགས་གྱུར་ཅིག། ཚིག་གི་སྒྲ་ཙམ་འདྲ་ན་ཡང༌། དོན་ལ་ཁྱད་པར་ཤིན་ཏུ་ཆེ།། དེ་ཕྱིར་བརྡ་དག་ལ་བརྟེན་ནས།། མ་ནོར་དོན་རྣམས་འཚོལ་བ་གཅེས།། དོན་ལ་མི་རྨོངས་རྨོངས་པ་ཡང༌།། ལུགས་འདིར་མཁས་མིན་གྱིས་བྱེད་དེ།། སྒྲ་ཤེས་དོན་ལ་མི་རྨོངས་ཞེས།། མཁས་པའི་གསུང་ལ་ཡོངས་སུ་གྲགས།། འདི་ལ་མ་སྦྱངས་རྨོངས་ཚོད་ཀྱིས།། འཆད་རྩོད་རྩོམ་པའི་གྲྭར་འཇུག་ན།། ཝ་སྐྱེས་སེང་ལྤགས་གྱོན་པ་བཞིན།། ནམ་ཞིག་རྗེས་ངན་གསལ་བར་འགྱུར།། དེ་ཕྱིར་བློ་གསལ་དོན་གཉེར་རྣམས།། རྟགས་འཇུག་དཀའ་གནད་གཟུགས་བརྙན་ཀུན།། གསལ་བར་འཆར་བའི་མེ་ལོང་འདིར།། ལ་འུར་གཟིགས་མོར་སྤྱོན་དང་ཀྱེ།། འདི་ལ་ནོངས་པའི་ཚོགས་མཆིས་ན།། གཟུར་གནས་མཁས་པའི་སྤྱན་སྔར་འཆགས།། ཅུང་ཟད་འབད་ལས་ཐོབ་པའི་དགེས།། ཀུན་གྱིས་འདི་དོན་རྟོགས་པར་ཤོག། ཅེས་རྟགས་ཀྱི་འཇུག་པའི་སྙིང་པོའི་དོན་མདོ་ཙམ་བརྗོད་པ་དཀའ་གནད་གསལ་བའི་མེ་ལོང་ཞེས་བྱ་བ་འདི་ནི། རང་གི་སློབ་བུ་རྗེས་དྲུང་སངས་རྒྱས་རྒྱ་མཚོ་དང་དོན་གྲུབ་ཕུན་ཚོགས་གཉིས་ཀྱིས་དགོས་ཚུལ་ལྟར། མཁས་མཆོག་སི་ཏུ་པཎ་ཆེན་དང་ཐམས་ཅད་མཁྱེན་པ་དྷརྨ་བྷ་དྲ་དཔལ་བཟང་པོའི་བཞེད་པ་དང་མཐུན་པར་དབྱངས་ཅན་གྲུབ་པའི་རྡོ་རྗེས་སྦྱར་བའོ།།།།
Comments
Post a Comment