ངག་རྒྱུགས། ངག་ཐོག་དྲི་བ་དྲིས་ལན། བཀྲ་ཤིས་རྡོེ།

 ངག་རྒྱུགས། ངག་ཐོག་དྲི་བ་དྲིས་ལན།

རང་གི་ནང་ན་ཡོད་པའི་ ཡོན་ཏན་རྐྱངམ་ཅིག་གིས་ གནམ་མཐོང་མི་ཚུགས་ དེ་འབདཝ་ལས་ ཕྱིའི་ལུས་ཀྱི་སྤྱོད་པ་ཚུ་ཡང་ ཟབ་ཏོག་ཏོ་དང་ ཞི་ཞིང་དུལ་བ་སྦེ་ འོང་དགོཔ་ཁག་ཆེ། ཀུན་སློང་ཀུན་སྤྱོད་ ཡ་རབས་ཀྱི་རིགས་ཨིནམ་པ་ཅིན་ ལཱ་དང་བྱ་བ་ག་ཅི་བཟུམ་འབད་རུང་ རང་བཞིན་ཤུགས་ཀྱིས་ གྲུབ་ནི་ལུ་ཐེ་ཚོམ་མེདཔ་ཨིན། ས་སྐྱ་ལེགས་བཤད་ལས་ རང་ལས་གཅེས་པར་འགྱུར་པ་ཡི།། འཇིག་རྟེན་འདི་ནང་མེད་བཞིན་དུ།། རང་གི་སྐྱོན་ཡོན་མི་བསམ་པ།། དུད་འགྲོ་རྣམས་དང་ཁྱད་པར་ཅི།། ཟེར་གསུངས་དོ་བཟུམ་ རང་ལུ་ཡོད་པའི་ སྐྱོན་དང་ཡོན་ཏན་ཚུ་ རང་གིས་བརྟག་དཔྱད་འབད་དེ་ དུས་མཐུན་བཟོ་དགོཔ་ཡང་ ཁག་ཆེ། རྒྱལ་ཡོངས་ཀྱི་གནས་ཚད་ནང་ ངག་རྒྱུགས་ལེན་མི་འདི་ཡང་ གཙོ་བོ་རང་ རང་གི་ནང་ན་གི་ཡོན་ཏན་དང་ ཕྱིའི་བྱ་སྤྱོད་ བཟོད་བསྲན་དང་ དུས་དང་བསྟུན་པའི་ གདོང་ལེན་འབད་ཐངས་ཚུ་ ག་དེ་སྦེ་འདུག་ག་ རིག་པ་གཡོག་བཀོལ་ཏེ་ གོང་འོག་རིམ་པ་སྒྲིག་ཐངས་ཚུ་གི་ ཡང་ལྗིད་བརྟག་དཔྱད་འབད་ནིའི་ འཕྲུལ་རིག་བཟུམ་གཅིག་ཨིན། 

(ངག་རྒྱུགས་བཀོད་རིས་སྐད་བསྒྱུར།)

࿄ དང་པ་ སྤྱོད་ལམ་དང་རང་གཤིས།

རང་གི་མགུ་ཏོག་ཁར་ སྐྱ་བཞག་ཐངས་ བགོ་དང་དཀྱི་ར་དཀྱི་ཐངས་ཚུ་ ཚུལ་མཐུན་སྦེ་ གྱོན་དགོ། སྐྱ་ཚོན་གཏང་ནི་དང་ མཆུ་ཚོན་གཏང་ནི་ རྣམ་ཅོག་གུ་འདྲཝ་མ་འདྲཝ་ཚུ་ཡང་ བཏགས་ནི་མི་འོང་།

࿄  གཉིས་པ་ སྐད་ཡིག་ཡང་དག།

དྲི་བའི་སྐད་ཡིག་དང་བསྟུན་ ལན་ཡང་ སྐད་ཡིག་འདི་གི་ཐོག་ལུ་ ཞུ་དགོ ཁ་སྐད་དང་སྐད་ཡིག་ གཞན་ཤེས་ག་ཟེར་གསུངས་པ་ཅིན་ ཤེས་པ་ཅིན་རྐྱངམ་ཅིག་ ཤེས་ཟེར་ཞུ་དགོ དེ་ཡང་ སྐད་ཡིག་ཡང་ན་ ཁ་སྐད་འདི་གི་ཐོག་ལུ་ དྲི་བ་བཀོད་ནིའི་ ཉེན་ཁ་ཡོད།

࿄ རིག་པ་ འཇོན་ཐངས་དང་ ལྕོགས་གྲུབ།

༓རང་གི་ཆོས་ཚན་དང་ འབྲེལ་བ་ཡོད་པའི་ གནད་དོན་ཚུ་ ཤེསཔ་སྦེ་བཟོ་དགོ

༓འབྲུག་རྒྱལ་ཁབ་དང་ རྒྱལ་སྤྱིའི་འཕྲལ་གྱི་གནས་ཚུལ་ཚུ་ དུས་མཐུན་བཟོ་དགོ

༓ལན་སྤྱན་ཞུ་འབདཝ་ད་ སྤྱན་ཞུའི་རིག་རྩལ་དང་ གོ་རིམ་ཚུ་སྒྲིག་སྟེ་སླབ་དགོ

༓དྲི་བ་འདི་ དབྱེ་དཔྱད་ལེགས་ཤེམ་སྦེ་ འབད་ཤེས་དགོ

༓དྲི་བ་ ཧ་གོ་ཞིནམ་ལས་ རྐྱངམ་ཅིག་ ལན་ཁ་གསལ་སྦེ་ཞུ་དགོ

༓རང་ལུ་ བློ་སྤོབས་དང་སེམས་ཤུགས་ དགོ

࿄ ཀུན་ཚང་ཤེས་ཡོན་ ག་ཅི་ནང་རང་ གྲལ་གཏོགས་འབད་ཡི་ག་ གྲུབ་འབྲས་ཚུ་ གསལ་སྟོན་འབད་དགོ

࿄ ཤེས་ཡོན་དང་འབྲེལ་བའི་ ལག་ཁྱེར་ རྒྱལ་ཡོངས་དང་སློབ་གྲྭ་ནང་ལས་ ཐོབ་ཡོད་མི་ སྐུགས་ཚད་དང་ ལག་ཁྱེར་ངོ་མ་ཚུ་ལུ་ གཞི་བཞག་སྟེ་ སྐུགས་གནང་འོང་།

རིམ་པ།

࿄ ཁྱོད་ཀྱི་སྔོན་མ་འགྱོ་མི་ མི་ངོམ་ཚུ་ལུ་ དྲི་བ་ག་ཅི་རང་འདྲི་ནུག་ག་ འདྲི་བལྟ་དགོ། མ་གཞི་ དྲི་བ་ཅོག་གཅིགཔ་ མི་འདྲི་ཟེར་ཡང་ སླབ་མི་ཤེས། དེ་འབདཝ་ལས་ བཅའ་སྒྲིག་རྐྱབ་དགོ དེ་མ་ཚད་ རང་བློ་སྤོབས་བཏགས་ནིའི་ རྒྱུ་ཅིག་ཡང་ འདི་ཨིན།

࿄ ཁྱོད་ཀྱི་མིང་འབོཝ་ད་ ཡིག་ཆ་ཚུ་ ག་ར་སྤྲོད་དགོ དེ་སྦེ་ འབད་མི་འདི་ཡང་ ཁྱོད་ནང་ན་མ་འབོཝ་ལས་ ཁྱོད་ཀྱི་ཡིག་ཆ་ཚུ་ དྲི་ལེན་འབད་མི་ཚུ་གིས་ གཟིགས་ཞིབ་གནང་འོང་། དེ་ལས་ ཁོང་འགོ་དཔོན་ཚུ་གིས་ ཁྱོད་ནང་ན་འབོ་འོང་།

࿄ ནང་ན་འགྱོཝ་ད་ སྒོ་ཕྱེ་ཐངས་ ལོག་བསྡམ་ཐངས་དང་ ཕྱག་དབང་ཐོབ་རིམ་དང་ འཁྲིལ་བཅར་ཐངས་ཚུ་ ཚུལ་མཐུན་སྦེ་ཤེས་དགོ

࿄ ས་ཁར་སྡོད་ཟེར་ མ་གསུངསམ་ཚུན་ སྡོད་ཁྲི་གུ་སྡོད་ནི་མི་འོང་། ས་ཁར་སྡོད་ཟེར་ གསུངས་ད་ ཚུལ་མཐུན་སྦེ་མེནམ་པར་ རྐངམ་རང་རོང་གཏང་སྟེ་ སྡོད་ནི་མི་འོང་། འདི་ནང་ རང་གི་བདེཝ་རང་གིས་བཟོ་དགོ་པའི་ཁར་ ངག་རྒྱུགས་ཀྱི་ལྷན་འཛིན་དང་ འཐུས་མི་ག་དང་ག་རང་འདུག་ག་ ཚར་གཅིག་བལྟ་དགོ  འབྲུག་རྒྱལ་ཁབ་ནང་ ཡོངས་གྲགས་ཅན་ རང་གི་སྔོན་མ་མཐོང་མི་རེ་ཡོད་པ་ཅིན་ བློ་སྤོབས་ཐོབ་ཐངས་རང་ མི་འདྲ།

࿄ གདམ་འཐུའི་ལྷན་འཛིན་གྱིས་ རང་གི་སྐོར་ལས་ ངོ་སྤྲོད་འབད་ཟེར་ སྐད་ཡིག་ག་ཅི་ནང་ གསུངས་མི་འདི་ རང་གིས་ཡང་ སྐད་ཡིག་འདིའི་ཐོག་ལུ་རང་ ཞུ་དགོ ངོ་སྤྲོད་འབདཝ་ད་ རང་གི་ཧོངས་ལས་ རྒྱབ་བསྣོན་དང་ཁུངས་བཀོད་ཚུགས་པའི་ སྐོར་ལས་འབད་དགོ དེ་འབདཝ་ལས་ སྔོན་མ་ལས་ བཅའ་སྒྲིག་རྐྱབ་དགོ དཔེར་ན་ ཁྱོད་མདའ་རྩེད་ནི་ལུ་ སྤྲོ་བ་ཡོད་ཟེར་སླབ་པ་ཅིན་ འབའ་གི་ཉིན་ཟླ་ཐོབ་རིམ་གྱི་སྐོར་ལས།དང་ འབྲུག་དང་འཛམ་གླིང་གི་ཡོངས་གྲགས་ཅན་གྱི་ མདའ་རྩེདཔ་གི་ མིང་ཚུ་ཡང་སླབ་ཟེར་ གསུངས་པ་ཅིན་ རང་གིས སླབ་ཚུགསཔ་འབད་དགོ

࿄ དྲི་བའི་ལན་ ཞུཝ་ད་ཡང་ སྐད་ཀྱི་སེང་ཕབ་རན་ཏོག་ཏོ། རིག་པ་གཡོག་བཀོལ། གོ་རིམ་དང་འཁྲིལ་ ཞིབ་ཞིབ་སྦེ་ དགའ་འཛུམ་དང་བཅས་ སླབ་དགོཔ་ཨིན། དེ་མ་ཚད་ རང་གིས་ག་ཅི་ཞུ་མི་འདི་ དྲན་པ་བཏོན་ཏེ་ཞུ་དགོ་ དེ་ཡང་ དྲི་བ་ཚུ་ཡང་ རང་གི་ཞུ་མིའི་ནང་ལས་ འདྲི་ནིའི་གོ་སྐབས་ཡོདཔ་ཨིན།

࿄ དྲི་བའི་ལན་ ཤེས་པས་མནོ་ ལེ་ཤ་སླབ་མ་སྡོད་པར་ མཚམས་ཚོད་རན་ཏོག་ཏོ་སྦེ་ སླབ་དགོ་པའི་ཁར་ ལན་མ་ཤེས་པ་ཅིན་ དེ་འཕྲོས་ལས་ ༼མི་ཤེས་ལགས༽ ཟེར་ཞུ་ནི་མི་འོང་། རང་གི་ཧོངས་ལས་ ཟུར་ལན་གཅིག་ཕོག་ཚུགས་རུང་ འདི་རབ་ཨིན། དེ་མེན་རུང་ གོངམ་མ་འཁྲེལ་ལགས་ འདི་གི་སྐོར་ལས་ ང་གིས་ད་རིས་ལས་རང་ འཚོལ་ཞིབ་འབད་ནི་ཨིན་ཟེར་ ཞུ་རུང་ རང་ལུ་སྙིང་རུས་དང་བརྩོན་ཤུགས་ཡོད་པའི་ རྟགས་སྟོནམ་ཨིན།

࿄ རང་ལུ་ཟོད་བསྲན་དང་ ཧང་སྟོང་མར་གདོང་ལེན་འབད་ཐངས་ ག་དེ་སྦེ་འདུག་ག་ བལྟ་ནིའི་དོན་ལུ་ དྲི་བ་ག་མནོཝ་སྦེ་འདྲི་སྲིད། དེ་འབདཝ་ལས་ འདི་ཚུ་རང་གིས་ འཛིན་སྐྱོང་ཐབས་ཤེས་དགོ

࿄ མཇུག་ལུ་ རང་གི་ཧོངས་ལས་ དྲི་བ་འབད་རུང་ བསམ་འཆར་འབད་རུང་ གཅིག་ཞུ་ནིའི་གོ་སྐབས་གནང་པ་ཅིན་ ཞུ་ནི་རེ་ཡོདན་ སྨོན་འདེབས་དང་བཅས་ཞུ་དགོ ཨིན་རུང་ དྲི་ལན་ནང་ ག་དེ་སྦེ་ འགྱོ་ཡི་ག་ཚུ་གི་སྐོར་ལས་ ཞུ་ནི་མི་འོང་།

࿄ ཁང་མིག་འདི་ནང་ལས་ ལོག་འགྱོཝ་ད་ཡང་ རང་ཡར་ལོངམ་ཅིན་ ཕྱག་ལན་གཅིག་རྐྱབ་སྟེ་ ཚུལ་མཐུན་གྱི་སྒོ་ལས་ སྒོ་ཕྱེ་སྟེ་ རང་འགྱོཝ་ད་ སྒོ་ལོག་བསྡམ་འབག་དགོ

࿀ གོང་འཁོད་ཀྱི་ གནས་ཚུལ་ག་ར་ ཕྱོགས་སྒྲིག་པ་རང་གི་ སྐད་བསྒྱུར༼ཐིག་ཁྲམ༽དང་ རྒྱལ་ཡོངས་ཀྱི་ ངག་རྒྱུགས་ཐེངས་གསུམ་ བཅའ་མར་གཏོགས་ཡོད་པའི་ ཉམས་མྱོང་དང་ མཁས་དབང་ཚུ་ལས་ ཐོབ་པའི་ཡོན་ཏན་ ཁོ་ན་མ་གཏོགས་ གསར་བཟོ་དང་ ཚོང་འབྲེལ་གྱི་དོན་ལུ་མེན་ཟེར་ ཐུགས་ཁར་ངེས་གནང་།