སློབ་སྟོན་འབདཝ་ད་ ཕར་ཕྱིན་དྲུག་ཚང་ཚུལ།

 ང་བཅས་བདག་ཅག་གི་སྟོན་པ་ སངས་རྒྱས་བཅོམ་ལྡན་འདས་ མཛད་པ་བཅུ་གཉིས་ཀྱི་ཚུལ་སྟོན་གནང་སྟེ་ འཛམ་བུ་གླིང་ལུ་གྱི་འགྲོ་བ་སེམས་ཅན་ཚུ་གི་ ཐར་པའི་ལམ་སྟོན་པ་དང་ ག་དང་ཡང་མ་འདྲ་བའི་ མཆོག་ཏུ་འགྱུར་པའི་ སྐྱེས་བུ་དམ་པ་གཅིག་ཨིན། དེ་འབདཝ་ལས་ ལམ་བདེན་པ་བཞི་དང་ ཕར་ཕྱིན་དྲུག་ ཡང་དག་པ་སྦེ་ ཉམས་སུ་བླངས་སྟེ་ ཐར་པའི་གོ་འཕང་ཐོབ་པའི་ ཡ་མཚན་ཆེ་བའི་ ལོ་རྒྱུས་ལེ་ཤ་ཡོདཔ་ཨིན། ཕར་ཕྱིན་དྲུག་ཟེརཝ་ད་ གཞི་གཅིག་ལས་ གཞི་གཞན་གཅིག་ནང་ ཡང་དག་ཏོག་ཏོ་སྦེ་ ལྷོད་ཚུགས་མི་ལུ་ ཕ་རོལ་ཏུ་ཕྱིན་པ་ཟེར་སླབ་ཡོདཔ་ཨིན། ཕར་ཕྱིན་དྲུག་གི་ གོ་དོན་དང་ ཕར་ཕྱིན་ལྔ་འདི་ ཤེས་རབ་ནང་བསྡུ་ཚུལ་ དེ་ལས་ སློབ་སྟོན་ནང་་ ཕར་ཕྱིན་དྲུག་ཚང་བའི་ཚུལ་ ག་དེ་སྦེ་ཨིན་ན་ ཞུ་ནི་ཨིན།
 
དང་པ་ཕར་ཕྱིན་དྲུག་གི་གོ་དོན་ མདོར་བསྡུ་ཞུ་བ་ཅིན་ སྦྱིན་པ་ཟེར་མི་འདི་ གཏོང་བའི་སེམས་དང་བཅས་ ལན་དང་རྣམ་སྨིན་མེད་པའི་སྒོ་ལས་ གཞན་ལུ་བྱིན་པའི་དོན་ཨིན། ཚུལ་ཁྲིམས་ཟེར་མི་འདི་ ལུས་ངག་ཡིད་གསུམ་གྱི་སྤྱོད་ལམ་་ མཐུན་ཕྱོགས་ཉམས་སུ་ལེན་མི་ལུ་སླབ་ཨིན། བཟོད་པ་ཟེར་མི་འདི་ རང་ལུ་མི་གཞན་གྱི་གནོད་པ་འབད་མི་ལུ་ གནོད་ལན་མ་འཇལ་བར་སྡོད་ཚུགས་པའི་སྤྱོད་པ་ཡང་དག་པ་དང་། བརྩོན་འགྲུས་ཟེར་མི་འདི་ བརྩོན་གང་དགེ་བའི་ལཱ་ལུ་སྤྲོ་བ་བསྐྱེད་མི་དང་ སེམས་ཤུགས་ཡོད་པའི་ དོན་ཨིན། བསམ་གཏན་ཟེར་མི་འདི་ སེམས་མ་གཡེང་བར་ དམིགས་པ་རྩེ་གཅིག་ཏུ་ གནས་པའི་སེམས་བྱུང་ཅིག་ལུ་སླབ་ཨིན། དེ་ལས་ཤེས་རབ་ཟེར་མི་འདི་ དངོས་པོ་རྣམས་ཀྱི་ སྐྱོན་དང་ཡོན་ཏན་སོ་སོ་སྦེ་ རྣམ་པར་འབྱེད་ཚུགས་པའི་རིག་པ་ཅིག་ལུ་ གོ་ནི་ཨིན།
སྦྱིན་པ་ལས་བསམ་གཏན་ཚུན་ ཤེས་རབ་ལུ་བསྡུ་ཚུལ་འདི་ཡང་ ཆོས་རྣམས་རབ་ཏུ་ རྣམ་པར་དབྱེ་ཤེས་པའི་ རིག་པ་ ཤེས་རབ་འདི་མེད་པ་ཅིན་ ཕར་ཕྱིན་ལྔ་ཡང་དག་ཏོག་ཏོ་སྦེ་ གྲུབ་མི་ཚུགས།
དེ་ཡང་ རྒྱལ་སྲས་ལག་ལེན་ལས་ ཤེས་རབ་མེད་ན་ཕ་རོལ་ཕྱིན་ལྔ་ཡིས།། རྫོགས་པའི་བྱང་ཆུབ་ཐོབ་པར་མི་ནུས་པས།། ཐབས་དང་ལྡན་ཞིང་འཁོར་གསུམ་མི་རྟོག་པའི།། ཤེས་རབ་སྒོམ་པ་རྒྱལ་སྲས་ལག་ལེན་ཡིན།། ཟེར་གསུངས་དོ་བཟུམ་ རྒྱུ་ཤེས་རབ་འདི་མེན་པ་ཅིན་ བུམ་པའི་གཤམ་ལུ་ དོང་ཡོད་དོ་བཟུམ་སྦེ་ ཕར་ཕྱིན་ལྔ་ ག་དེ་སྦེ་གྲུབ་རུང་ ཡང་དག་ཏོག་ཏོ་སྦེ་ མཐར་ཕྱིན་མ་ཚུགས་པའི་རྐྱེན་ཡོད། ཐབས་མཁས་པའི་ཤེས་རབ་ལུ་ འཁོར་གསུམ་དམིགས་པ་དང་བཅས་ ག་ར་མེདཔ་ལས་ སྦྱིན་པ་ལས་བསམ་གཏན་ཚུན་ གཙོ་བོ་ཤེས་རབ་ཀྱི་ ཕ་རོལ་ཏུ་ཕྱིན་པ་ལུ་བསྡུཝ་ཨིན།
 
 
རྒྱས་སྲས་ལག་ལེན་ནང་ལས་ བྱང་ཆུབ་འདོད་པས་ལུས་ཀྱང་གཏོང་དགོས་ན།། ཕྱི་རོལ་དངོས་པོ་རྣམས་ལ་སྨོས་ཅི་དགོས།། དེ་ཕྱིར་ལན་དང་རྣམ་སྨིན་མི་རེ་བའི།། སྦྱིན་པ་གཏོང་བ་རྒྱལ་སྲས་ལག་ལེན་ཡིན།། ཟེར་གསུངས་དོ་བཟུམ་ རང་གིས་སློབ་ཕྲུག་ཚུ་ལུ་ བྱམས་པ་དང་རྩེ་བའི་སྒོ་ལས་ རང་གི་བུ་གཞི་བཟུམ་ གཅེས་སྐྱོང་འབད་དེ་ ཆོས་ཡོན་ཏན་སྟོནམ་ད་ ལན་དང་རྣམ་སྨིན་ མེད་པའི་སྒོ་ལས་ དཔེ་ཆ་སྟོན་པ་ཅིན་ དམ་པའི་ཆོས་ཀྱི་སྦྱིན་པ་ཡང་འདི་ཨིན།
 
 
བཤེས་སྤྲིངས་ལས་ ཁྲིམས་ནི་རྒྱུ་དང་མི་རྒྱུ་ས་བཞན་དུ།། ཡོན་ཏན་ཀུན་གྱི་གཞི་རྟེན་ལག་པར་གསུངས།། ཟེར་དོ་བཟུམ་ འབྲུག་གཞུང་གི་ཤེས་རིག་གི་ སྒྲིག་གཞི་དང་བཅའ་ཁྲིམས་དང་འཁྲུལ་ དཔེ་ཆ་སྟོན་དགོཔ་དང་ བྱ་བ་སྤྱོད་ལམ་ཚུ་ཡང་ མི་གཞན་གྱི་གདོང་ཁར་ ཟབ་ཏོག་ཏོ་དང་ ཚུལ་བཞིན་དུ་སྦེ་ སློབ་སྟོན་འབད་དགོཔ་ཨིན། དེ་མ་ཚད་ རང་གི་སློབ་ཕྲུག་ཚུ་འབད་རུང་ ཕམ་བཟང་པོའི་བུ་གཞི།། སློབ་དཔོན་མཁས་པའི་སློབ་ཕྲུག། ཟེར་ སྒྲིག་ལུ་གནས་སྟེ་སྡོད་དགོ་པའི་ཁར་ སྒྲིག་ལམ་ཆོས་གསུམ་ཡང་དགོཔ་ཨིན། 
 
སློབ་ཕྲུག་ཚུ་ལུ་དཔེ་ཆ་སྟོན་པའི་ཚེ་ བཟོད་པའི་ཐགཔ་འདི་ རིངམོ་སྦེ་བཞག་སྟེ་སྟོན་དགོཔ་དང་ ཨ་ལོ་ཚུ་གི་རིག་པའི་སྤུད་ཚད་ལུ་བལྟ་སྟེ་རྩིགཔ་ཟ་ནི་དང་ ནམ་རང་འབད་རུང་དྲི་བ་བཀོདཔ་ད་ རང་གིས་རྩིགཔ་ཟ་ནི་ཚུ་སྤང་སྟེ་ ལེགས་རུང་མ་ལེགས་རུང་ ཧན་རུང་མ་ཧན་རུང་ བཟོད་པ་སྒོམ་སྟེ་ ཕྱག་ཞུ་དགོཔ་ཨིན།
 
 
དཔེ་ཆ་སྟོན་པའི་ཚེ་ རང་ཡང་བརྩོན་འགྲུས་བསྐྱེད་དེ་ སློབ་སྟོན་འབད་དགོ་པའི་ཁར་ རང་ལུ་མེད་མི་འདི་ གཞན་ལུ་བྱིན་མ་ཚུགསཔ་བཟུམ་དང་ དཔེ་ཆ་སྟོན་ནི་བ་ལྷག་ རང་ཡང་སློབ་སྦྱོང་འབད་དགོཔ་ཨིནམ་འདི་ སེམས་ཁར་ངེས་ཏེ་ ལཱ་འབད་དགོཔ་ཨིན། བརྩོན་འགྲུས་ཅན་གྱི་མི་གིས་ རི་ཡང་ཐལ་བ་བརླག་ཟེར་ སླབ་སྲོལ་ཡོད་དོ་བཟུམ་སྦེ་ སློབ་དཔོན་དང་སློབ་ཕྲུག་གཉིས་ཆ་རང་ ཆོས་བལྟ་བའི་ནམ་དུས་ལུ་ བརྩོན་འགྲུས་བསྐྱེད་དགོཔ་ཨིན།
 
 
དཔེ་ཆ་སྟོན་པའི་སྐབས་ རང་དང་སློབ་ཕྲུག་གཉིས་ སེམས་ཉོན་མོངས་པའི་དབང་དུ་ཐལ་ཏེ་ ཕྱིའི་ཡུལ་ལུ་སེམས་བག་གཡེང་ མ་ཤོར་བར་ དམིགས་པ་རྩེ་གཅིག་ཏུ་བསྐྱེད་དེ་ སློབ་སྟོན་གནང་དགོཔ་ཨིན། སེམས་ཕྱིའི་ཡུལ་ལུ་གཡེང་པ་ཅིན་ རྣ་བ་མི་གཏད་ཁ་སྦུབས་ལྟ་བུའི་སྐྱོན།། ཡིད་ལ་མི་འཛིན་ཞབས་རྡོལ་ལྟ་བུའི་སྐྱོན།། ཉོན་མོངས་དང་འདྲེས་དུག་ཅན་ལྟ་བུའི་སྐྱོན།། ཟེར་ སྣོད་ཀྱི་སྐྱོན་གསུམ་གྱི་དབང་དུ་ཐལ་བ་ཅིན་ ཆོས་སྦྱངས་མི་ཚུགས་ལས་ སེམས་མ་གཡེང་པར་ སློབ་སྦྱོང་འབད་དགོཔ་ཨིན།
 
 
ང་བཅས་ཀྱིས་ ལཱ་བཟང་ངན་ག་ཅི་ཨིན་ན་ དབྱེ་བ་ཕྱེ་སྟེ་ སློབ་སྟོན་འབད་དགོ་པའི་ཁར་ སྤྱོད་འཇུག་ལས་ ཉོན་མོངས་ཉོན་མོངས་ཤེས་རབ་མིག་གིས་སྤང་།། ཟེར་གསུངས་དོ་བཟུམ་ ཨ་ལོ་ཚུ་ མ་རིག་པའི་གཉིད་ཐུགས་པོ་ལས་ སངས་ཐབས་ལུ་ ཤེས་རབ་ཀྱི་ལྷ་རྗེ་བཙུན་འཇམ་དབྱངས་དང་འདྲཝ་སྦེ་ གནང་མ་ཚུགས་རུང་ རང་ལུ་དགོཔ་ཁག་ཆེ་བའི་ རིག་པའི་ས་བོན་ བཟང་ཤོས་ཅིག་ ཨ་ལོ་ཚུ་གི་ ཁོག་པའི་ནང་ རྩིས་སྤྲོད་དགོཔ་ཨིན།