ངེའི་རྒྱལ་པོ་ སྐུ་འོ་བརྒྱལ་དོ།

དགའ་བའི་ཕོ་བྲང་གླིང་ཀ་ཁྲ་མོའི་ནང་།།

བཙུནམོ་དང་རྒྱལ་སྲས་མངའ་ཡབ་འཁོར་དང་བཅས།།

སྐུ་ཡི་རྒྱབ་ཁར་བཞག་སྟེ་མི་སེར་དོན།།

མཐའ་དབུས་མེད་པའི་ས་ནང་ཆིབས་སྐྱོད་གནང་།།

བསོད་ནམས་མེད་པའི་མི་སེར་ང་བཅས་གཞོར།།

ས་སྐྱོང་མི་དབང་ད་རིས་སྐུ་བརྒྱལ་དོ།།

སྐུ་སྨད་འདམ་དང་སྐུ་སྟོད་ཁཝ་དང་ཆརཔ།།

རླུང་དང་ཉིམ་པའི་དཀའ་སྡུག་མཛད་པར་ཕངས།།

ང་བཅས་མི་སེར་འབད་རུང་དེ་སྦེ་མ་སྡོད་པར།།

རང་གི་འགན་ཁུར་རི་དང་གསེར་བཟུམ་ཡོད་མི་འདི།།

སེམས་ཀྱིས་ལྕགས་ཀྱུ་ནང་ན་བཏབ་བཞིན་ལས།།

མཉམ་གཅིག་འབག་གེ་ང་བཅས་འབྲུག་མི་ཡོངས།།

དྲིན་ཆེན་མི་དབང་རྒྱལ་པོ་བཀའ་དྲིན་ཆེ།།

འབྲུག་མིའི་སྐྱབས་མགོན་སྐུ་ཚེ་རིང་བར་ཤོག།