སྨྱུ་གུ་ཚེ་རིང་བཟང་མོ། -བཀྲ་ཤིས་ནོར་བུ།

 སྨྱུ་གུ་ཚེ་རིང་བཟང་མོ།   

ཨོཾ་མ་ཧུྃཿ གླུ་མཆོད་པ་འབུལ་ལོ་དཀོན་མཆོག་གསུམ། །

ཐུགས་འགྱེས་པར་མཛོད་ཤོག་ཡི་དམ་ལྷ། །

རྐྱེན་བར་ཆད་སེལ་ཅིག་མཁའ་འགྲོའི་ཚོགས། །

སྙན་ལེགས་པར་གསོན་དང་འདིར་བཞུགས་ཀུན། །

ས་འདི་དང་ས་ངོ་མ་ཤེས་ན། །

ས་འདི་ནི་སྤ་རོ་ཆོམ་ཕུག་གནས། །

རི་ཀེེ་ལ་ཤ་ཡི་ཕྲེང་བས་བསྐོར། །

གནས་རྡོ་དང་གནས་ཤིང་གཙང་ཆུས་གང་། །

མི་ང་འདྲ་ང་ངོ་མ་ཤེས་ན། །

ཕོ་སྨན་ཆུང་དམངས་གི་དཔའ་བོ་ཡིན། །

ཡུམ་ཕུར་པ་བཟང་མོའི་བློ་གཏད་དང་། །

ཕ་དཔལ་ལྡན་འབྲུག་པའི་བུ་བརྒྱུད་ཡིན། །

༼      དངོས་པོའི་བཤད་པ   ༽     

སྦ་ཁུག་ནང་གི་ཅ་དངོས་འདི། །

གཟུགས་གཞི་སྙོམས་ལ་རྩེ་མོ་རྣོ། །

ལྗི་ཚད་ཡང་པའི་མཚོན་ཆ་འདི། །

སྨྱུ་གུ་ཚེ་རིང་བཟང་མོ་ཟེར། །

མྱུ་གུ་རྩྭ་རི་བྲག་ནས་འཁྲུངས། །

ཚོང་དཔོན་རྣམས་ཀྱིས་བཟོས་ནས་བཙོང་། །

བེད་སྤྱོད་སློབ་གཉེར་རྣམས་ཀྱིས་གཏོང། །

རྣམ་དཔྱོད་རིག་ཅན་རྣམས་ཀྱིས་སྤྱོད། །

ཨེ་རིང་བསམ་ན་ལག་མཐོ་གང་། །

ཨེ་རྣོ་བསམ་ན་སྤུ་ཡི་གྲི། །

ཨེ་སྲ་བསམ་ན་ཨིནྜའི་ལྕགས། །

ཨེ་མཛེས་བསམ་ན་ལྷ་མོའི་འཛུབ། །

ལན་གཅིག་རི་མོ་བརྐོས་པ་ན། །

རི་མོ་པ་ཏྲ་མཚོ་ཡི་རླབས། །

རི་མོ་ལན་གཉིས་བརྐོས་པའི་ཚེ། །

རི་མོ་མི་ཡལ་བརྟན་གྱི་རྒྱན། །

རི་མོ་ལན་གསུམ་བརྐོས་པ་ན། །

ལོ་བསྐལ་བར་དུ་རྒྱབ་རྟེན་བྱེད། །

མཁས་པའི་ཁྱད་ཆོས་རྩོམ་གྱི་རྒྱུ། །

གྲགས་པའི་མིང་གཏམ་འབྲུག་སྒྲ་སྒྲོགས། །

དཔོན་སྨྱུ་གུ་ཚེ་རིང་བཟང་མོ་ཡིས། །

ཕྱི་པ་ཏྲ་མིག་གི་མེ་ཏོག་བརྒྱན། །

ནང་བརྐོས་པའི་ཚིག་གིས་མདའ་མོ་འཛུགས། །

གསང་དགྲ་ཡི་ཁོང་ཁྲོ་ཁྲག་ཚ་ཁོལ། །

༼     མཇུག་སྡོམ༽    

སྨྱུ་གུ་ཚེ་རིང་བཟང་མོ་འདི། །མཁས་པ་རྣམས་ཀྱི་མཚན་ཆ་ཡིན། །

རྩོམ་པའི་སྒྱུ་རྩལ་འདོད་པ་ན། །མཛེས་པའི་སྨྱུ་གུ་བདག་པོར་བགྱིས། །

ཤར་ཕྱོགཔ་བཀྲིས་ནོར་བུ་ཡིས། །གེ་སར་སྒྲུང་ལ་གཞི་རྟེན་ནས། །

སྨྱུ་གུ་ཚེ་རིང་བཟང་མོའི་བསྐོར། །བསམ་པའི་གླེང་མོ་ཅུང་ཞིག་སྤྲོས། །

   -བཀྲ་ཤིས་ནོར་བུ།