༄༅། །དཔལ་སྤྲུལ་རིན་པོ་ཆེའི་ཞལ་གདམས་བཞུགས་སོ། །

༄༅།  །དཔལ་སྤྲུལ་རིན་པོ་ཆེའི་ཞལ་གདམས་བཞུགས་སོ། །

༈ སྐྱེ་མ་ཚེ་སྔོན་ལས་ཀྱིས། །

དལ་འབྱོར་བཅོ་བརྒྱད་ལྡན་པའི། །

མི་ལུས་རིན་ཆེན་རྙེད་དུས། །

རྣམ་གཡེང་ཚེ་འདིའི་དབང་གིས། །

འཆི་ལ་ཐུག་གི་བར་དུ། །

དམ་ཆོས་སྙིང་ནས་མ་དྲན། །

བླ་མ་དམ་པ་མཁྱེན་ནོ། །

༈ ད་ནི་དེང་ནས་བཟུང་སྟེ། །

ལོང་སྐབས་ཅུང་ཟད་ཡོད་ཚེ། །

ཚེ་འདིར་ལྟོགས་གྲིར་འཆི་ཡང་། །

ཕྱི་མར་ཕན་པའི་ཆོས་རེམས། །

༈ ཚེ་འདིར་དགྲ་འདུལ་གཉེན་སྐྱོང་། །

འཇིག་རྟེན་འཁོར་བའི་བྱ་བཞག །

དེ་སྔོན་མ་བྱས་ཅི་ཡོད། །

དེ་སྔོན་བྱས་བྱས་འབྲས་བུ། །

རྣམ་སྨིན་རང་གིས་མྱོས་ཚར། །

༈ ད་རུང་དེ་བས་མི་ཚད། །

འཆི་བསམ་ཡིད་ལ་མེད་པ། །

ཚེ་འདིར་དོན་གཉེར་ཞིག་ལ། །

བསམ་པ་ཆགས་ཤིང་གདའ་སྟེ། །

ཉིན་རེ་ཞག་རེ་སོང་བཞིན། །

འཆི་ལ་ཇེ་ཉེ་རེད་འདུག །

༈ འཆི་དགོས་བསམ་པ་མེད་པའི། །

རྒན་གཞོན་ཕོ་མོ་འདི་ཚོས། །

ཡིད་ལ་ཅི་འདྲ་དྲན་བྱུང་། །

ད་ནི་དུད་འགྲོ་ཡིན་ཀྱང་། །

ཕྱི་མར་ཅི་འདྲ་ཡོད་གྲགས། །

ཧ་ལམ་གོ་ཚོད་ཨེ་ཡིན། །

༈ ཚེ་འདིར་ཇི་ལྟར་སྐྱིད་ཀྱང་། །

ཕྱི་མའི་སྡུག་བསྔལ་རྒྱུ་ཡིན། །

འཆི་བ་མི་རྟག་པ་དེ། །

ནམ་ཡང་ཆ་མེད་རེད་པས། །

ནམ་ཞིག་འཆི་བ་ཤེས་ཀྱང་། །

རེ་ཞིག་མི་འཆི་སྙམ་པའི། །

ལེ་ལོ་དེ་འདྲ་མ་བྱེད། །

༈ ད་ལྟ་ཁོ་ན་ཉིད་དུ། །

མི་འཆིའི་ངེས་པ་མེད་པས། །

ད་ནི་འཆི་རན་སྙམ་པའི། །

བློ་ཐག་རྦད་ཀྱིས་ཆོད་ལ། །

ཕྱི་མར་ཕན་པའི་ཆོས་རེམས། །

༈ འཆི་བདག་བདུད་པོས་ནོན་ཚེ། །

སྔར་བྱས་རྣམ་སྨིན་དྲན་ནས། །

ཅི་བྱེད་རང་དབང་མེད་པར། །

བྲང་ལ་སྦར་མོས་བཏབ་ནས། །

ང་རང་མི་འཆིའི་ཐབས་ཤིག །

ཨ་ཕ་ཨ་མ་ཅི་དྲག །

ཟེར་མི་མང་པོ་གདའ་སྟེ། །

ཐབས་ཤིག་ཡོད་ན་དྲག་སྟེ། །

ཨ་ཕ་ཨ་མས་ཅི་བྱེད། །

༈ ད་ནི་རང་བཞིན་མེད་པ། །

འཆི་བ་མི་རྟག་པ་ལ། །

ཅི་བྱེད་ངོ་མ་མི་འདུག །

བསམ་ལོང་དྲན་ལོང་མེད་པ། །

འཆི་བདག་གཤིན་རྗེ་ཁོ་ཡིས། །

སྐད་ཅིག་རང་དབང་མེད་པར། །

སོད་སོད་རྒྱོབ་རྒྱོབ་ངང་ནས། །

ཕྱི་མའི་ལམ་དུ་འཁྲིད་འགྲོ། །

༈ བསྐལ་པ་སྟོང་ཕྲག་རེ་ལ། །

དྲིན་ཅན་ཨ་མ་དེ་རྣམས། །

དམྱལ་བར་གནས་དགོས་བྱུང་ཡང་། །

རང་རེ་རྨོངས་པ་རྣམས་ཀྱིས། །

ཧ་ལམ་ཙམ་ཡང་མི་ཤེས། །

༈ ན་ཆུང་གཞོན་པ་ཚོ་ལ། །

བན་རྒན་བཅོས་གཏམ་མིན་ཏེ། །

ཚེ་རབས་སྔ་མའི་ལས་ཀྱིས། །

ད་ལྟའི་ཕ་མ་བུ་རྒྱུད། །

ཁྱིམ་མཚེས་ཉེ་འབྲེལ་རྣམས་ཀྱང་། །

རྡོ་ཐོག་བ་མོ་ལྟ་བུའི། །

གནས་སྐབས་འདི་ན་འདུག་ཚེ། །

བྲག་རི་ཐོག་གིས་གཏོར་འདྲ། །

༈ ཞེ་སྡང་ཁོང་ཁྲོ་མ་ཤོར། །

ཞེ་སྡང་དམྱལ་བའི་རྒྱུ་ཡིན། །

འདི་འདྲ་ཟེར་འདུག་མ་བསམ། །

ཡུན་རིང་གཤིབ་མི་མ་ཡིན། །

ཚོང་འདུས་མགྲོན་པོ་ཇི་བཞིན། །

གར་འགྲོ་ཆ་མེད་རེད་པས། །

ཕ་མའི་དྲིན་ལན་མེད་ཀྱང་། །

ཚིག་རྩུབ་འཐབ་མོ་མ་བྱེད། །

ཕ་མར་ཆག་ཉམས་སོང་ན། །

ཕྱི་ལུས་ལེན་པ་དཀའ་བས། །

ཕ་མར་བྱམས་སྐྱོང་གྱིས་ཤིག །

༈ འཆི་ནད་དྲག་པོ་ཐེབས་དུས། །

ཁྱིམ་མཚེས་ཉེ་འབྲེལ་རྣམས་ཀྱིས། །

ནད་པ་ཅི་འདྲ་ཟེར་དུས། །

བུ་དང་ཆུང་མ་རྣམས་ཀྱིས། །

ཨ་ཕ་ཤི་བར་གྱུར་ན། །

ངེད་ཚོས་ཅི་བྱེད་དགོས་ལེ། །

མི་ཚེ་ཆོད་ཐབས་མི་འདུག །

ཡོད་ཚད་ཆོས་ལ་བསྒྱུར་ནས། །

ས་མཐར་གནས་བསྐོར་འགྲོ་སྐད། །

དེ་འདྲ་ཟེར་མི་གདའ་སྟེ། །

ཁ་ཟེར་དོན་ལ་མི་འདུག །

༈ ཞག་གསུམ་སྔ་བདུན་མཚམས་ནས། །

རོ་དེ་མེད་པ་ཐུབ་ནས། །

ཤི་གསོན་བསམ་པ་ཁ་ཁ། །

རང་རང་འདུག་ཆས་ཅི་དྲག །

བསམ་བློ་གཏོང་མི་མ་གཏོགས། །

ཤི་འཕོ་དྲན་མི་མི་འདུག །

༈ ལས་འབྲས་བསམ་བློ་བཏང་ན། །

ཨ་རེ་རང་གཞན་མེད་པ། །

གཅིག་རྗེས་གཅིག་ལ་མ་གཏོགས། །

འདུག་ས་ཡོད་རབས་མི་འདུག །

མཐོ་དམན་དྲག་ཞན་ཀུན་ལ། །

འདི་འདྲའི་དུས་ཤིག་འོང་རན། །

སྔོན་ལས་བཙན་པོའི་དབང་གིས། །

མི་འོང་ཐབས་ནི་མི་འདུག །

༈ ཡར་འགྲོ་མར་འགྲོའི་ས་མཚམས། །

ད་ལྟ་རང་ལག་ཡོད་དུས། །

མ་གཡེང་དམ་ཆོས་སྒྲུབ་དགོས། །

འཆི་བ་ཐོག་ཏུ་སླེབ་ཉིན། །

དེ་དུས་འགྱོད་མེད་རེམ་རེམ། །

༈ ད་ལྟ་ལུས་རྟེན་འདི་ལ། །

སྙུང་གནས་ལན་གཅིག་བསྡད་ན། །

ངན་སོང་སྐྱེ་སྒོ་ཆོད་པར། །

འཕགས་པའི་ཞལ་གྱིས་བཞེས་ཀྱང་། །

རྨོངས་པ་ཕལ་ཆེར་རྣམས་ཀྱིས། །

རང་དོན་ཡིན་པ་མ་ཤེས། །

༈ དེ་འདྲའི་སྐོམ་ལེ་ཟེར་ནས། །

དམུས་ཐག་ཆོད་པར་གདའ་སྟེ། །

ཨ་རེ་དེ་འདྲ་མ་ཡིན། །

ཕྱི་མ་བཀྲེས་སྐོམ་སྡུག་བསྔལ། །

ལོ་གྲངས་སྟོང་ཕྲག་རེ་ལ། །

ཆུའི་མིང་ཙམ་མ་མཐོང་། །

༈ ལས་ངན་དེ་འདྲའི་གནས་ལ། །

ཕ་མ་དྲིན་ཆེན་དེ་རྣམས། །

མེད་ལ་ངེས་པ་མེད་པས། །

ཅི་འདྲ་འོང་ས་གདའ་འོ། །

ད་ལྟ་བསམ་བློ་ཐོངས་དང་། །

༈ ཨ་མ་དྲིན་ཆེན་མ་དེ། །

གར་སོང་རྗེས་མགོ་མེད་པས། །

བསམ་བློ་བཏང་ཞིང་བཏང་ལ། །

ལས་ངན་ཤན་པ་ཡིན་ཀྱང་། །

མིག་ནས་འཆི་མ་ཤོར་ཡང་། །

མ་ཎི་རྡོག་གཅིག་འདོན་ཀྱང་། །

དེ་ཡི་དོན་དུ་བསྔོས་ཤིག །

༈ ལ་རྒྱ་ཟེར་ལེ་མིན་ཏེ། །

མར་མེ་ཀོང་བུ་རེ་ལ། །

སེར་སྣ་འཇུར་གེགས་མ་ཤོར། །

སེར་སྣ་འཇུར་འགེགས་ཤོར་ན། །

ཕན་པ་མི་དགོས་གནོད་པ། །

བཀྲེས་སྐོམ་སྐྱེ་བའི་རྒྱུ་ཡིན། །

༈ སྐྱབས་གནས་དཀོན་མཆོག་གསུམ་ལ། །

དངོས་པོ་ཆེ་ཆུང་མ་གཏོགས། །

རྒྱུ་ཟས་གང་ཡོད་འབུལ་དུས། །

སེར་སྣ་མ་ཤོར་རེམ་རེམ། །

༈ ལྷག་ཏུ་ཡིད་ལ་བཞག་རྒྱུ། །

འཕགས་པའི་དགེ་འདུན་རྣམས་ལ། །

དད་པ་དག་སྣང་མེད་ཀྱང་། །

འཆི་བ་སྲོག་ལ་བབས་ཀྱང་། །

སྐུར་འདེབས་གཏན་ནས་མི་རུང་། །

༈ ཕྱོགས་བཅུའི་སངས་རྒྱས་སྤྱི་གཟུགས། །

དཀོན་མཆོག་ཀུན་འདུས་བདག་ཉིད། །

དྲིན་ཆེན་རྩ་བའི་བླ་མ། །

ངོ་བོ་གུ་རུ་པད་འབྱུང་། །

ཅི་མཛད་ཁྱོད་ཤེས་སྒོ་ནས། །

ཉིན་མཚན་དུས་དྲུག་རྣམས་སུ། །

གསོལ་བ་རྒྱུན་དུ་ཐོབས་དང་། །

ཅི་བསམ་ལྷུན་གྱིས འགྲུབ་འོང་། །

༈ བན་རྒན་འཁྲུལ་གཏམ་མིན་ཏེ། །

འཆི་བ་ཁ་ཞེ་མེད་པར། །

སྙིང་ནས་དྲན་མི་ཡོད་ན། །

འདི་ལ་ཞིབ་ཏུ་ལྟོས་དང་། །

སྙིང་གཏམ་མི་ལ་བཤད་ཡོད། །

༈ ད་ནི་རང་གཞན་མེད་པ། །

སུ་དང་གང་འདྲ་ཡིན་ཀྱང་། །

ཚེ་འདིའི་སྣང་བ་ནུབ་ཚེ། །

སྐྱབས་གནས་དཀོན་མཆོག་མ་གཏོགས། །

རེ་ས་གཞན་ན་མེད་པས། །

ཆོས་ཀྱི་སྙིང་པོ་དམ་པ། །

མ་ཎི་ཡིག་དྲུག་བགྲོངས་ཤིག །

༈ སྐད་ཅིག་ཚེ་འཕོས་ཐག་ཏུ། །

བདེ་ཆེན་ཞིང་གི་མགོན་པོ། །

རྒྱལ་བ་འོད་དཔག་མེད་མགོན། །

དབྱེར་མེད་རྩ་བའི་བླ་མ། །

དཔལ་སྤྲུལ་རྡོ་རྗེ་འཆང་ཆེན། །

མ་རྒན་འགྲོ་བ་འདི་རྣམས། །

བདེ་ཆེན་ཞིང་དུ་དྲོངས་ཤིག །