ཧེ་མ་ བསྐལ་པ་བཟང་པོའི་དུས་ལུ་ ལྷ་དང་ཀླུ་ དྲང་སྲོང་དེ་ཚུ་གིས་ ནོར་བུ་སྣ་ཚོགས་གཅིག་ཁར་བསྡུས་ཏེ་ ལྷོ་ཕྱོགས་རྒྱ་མཚོ་ཆེན་པོའི་ནང་ལུ་ སངས་རྒྱས་རྣམ་པར་སྣང་མཛད་ཀྱི་ སྐུ་གཅིག་བཞེངས་ཏེ་ཡོད་མི་དེ་གི་ དབུའི་གཙུག་ཏོར་དེ་ ནོར་བུ་ཆུ་ཤེལ་གྱིས་ བཞེངས་ཡོདཔ་ཨིན་མས།
དེ་ལས་ གནམ་ཁའི་རྒྱུ་སྐར་གྱི་གྲལ་ཁར་ སྐར་མ་རྀ་ཥི་ཟེར་མི་ སྐར་མ་ཅིག་ཡང་ ཡོདཔ་ཨིན་མས། སྐརམ་དེ་ ངོ་བོ་ཆུ་ཤེལ་གྱི་རང་བཞིན་ ནོར་བུ་ཀེ་ཏ་ཀ་ ཟེར་མི་དེ་ལས་ གྲུབ་གྲུབ་ཨིན་མས། དེ་ལས་ སྐར་མ་རྀ་ཥི་དེ་ གནམ་ཁ་ལས་ཕར་ རི་རབ་བསྐོར་ཏེ་ འགྱོཝ་ད་ལུ་ ཟླ་བ་བརྒྱད་པའི་དབུགས་འཐོབ་ཀྱི་ཉིནམ་ཟེར་ ཁྲུས་བབས་ཀྱི་ཉིནམ་དེ་ལུ་ ལྷོ་ཕྱོགས་རྒྱ་མཚོ་ནང་ བཞེངས་ཏེ་ཡོད་མི་ སངས་རྒྱས་རྣམ་པར་སྣང་མཛད་ཀྱི་ དབུའི་གཙུག་ཏོར་ ནོར་བུ་ཆུ་ཤེལ་ལས་ གྲུབ་མི་དེ་དང་ ཕྱེདཔ་ཨིན་ཟེར་ཨིན་མས།
སྐར་མ་རྀ་ཥི་འདི་ སངས་རྒྱས་རྣམ་པར་སྣང་མཛད་ཀྱི་ དབུའི་གཙུག་ཏོར་ལས་ འབྱིད་དེ་འགྱོ་ཚུགས་ཚུགས་ལུ་ ཞག་བདུན་འགོར་དོ་ཡོདཔ་ལས་ དུས་ཚོད་དེ་གི་སྐབས་ལུ་ སངས་རྒྱས་ཀྱི་ཐུགས་བསྐྱེད་སྨོན་ལམ་དང་། སྐར་མ་རྀ་ཥིའི་གཉིས་འཕྱད་པའི་རྟེན་འབྲེལ་ལས་བརྟེན་ཏེ་ སངས་རྒྱས་ཀྱི་དབུའི་གཙུག་ཏོར་ལས་ བདུད་རྩི་གི་ཆུ་རྒྱུན་བབས་མི་དེ་གིས་ འཛམ་གླིང་གི་ཆུ་ཕྲན་དེ་ཚུ་ག་ར་ བདུད་རྩིའི་རང་བཞིན་ལུ་འགྱུར་ནི་དེ་གིས་ དུས་ཚོད་དེ་ལུ་ སྐུ་ཁྲུས་གནང་པ་ཅིན་ ལུས་ཀྱི་ནད་དང་ སེམས་ཀྱི་སྒྲིབ་པ་དེ་ཚུ་ དག་ཚུགས་ཟེར་བཤདཔ་ཨིན་མས།
ཁྲུས་བབས་ཀྱི་ཉིནམ་ལུ་བཀྲིས་བདེ་ལེགས་ཞུའོ།།
འབྱུང་གནས་ཕེསའི་བྷུག།
