དུས་དང་གནས་ཡུལ་ ཕུན་སུམ་ཚོགས་པའི་ སྐལ་བ་དང་ལྡན་པའི་ དུས་ཚོད་བཟང་ཤོས་འདི་ནང་ དལ་འབྱོར་ཚང་བའི་མིའི་ལུས་རྟེན་གི་ སྒོ་དང་པ་ཕྱེ་གནང་མི་ དྲིན་ཆེན་ཕམ་གཉིས་ཀྱི་ དྲིན་ཆེན་པོ་འདི་ བསྐལ་པ་བརྒྱ་སྦེ་ལངས་རུང་ མཇལ་མི་ཚུགས་པའི་ཁར་ སྟོང་གསུམ་གསེར་ལུ་བསྒྱུར་ ནོརཔ་དགོས་འདོད་སྤུངས་འཇོམས་ དངོས་སུ་ཕུལ་རུང་ དྲིན་ལན་མཇལ་མ་ཚུགས་པའི་ བཀྲིན་ཅན་གྱི་བདག་ཉིད་ཁོ་ན་ཨིནམ་ལས་ ད་རིས་ དམ་ཚིག་གི་ཚུལ་བཟུམ་སྦེ་ ངེའི་དྲིན་ཆེན་ཕམ་གཉིས་ལུ་ ཧིང་ལས་རང་ བཀྲིན་ཆེ་ཟེར་ཞུ་ནི་ཨིན་ལགས།
ད་རེས་ཚུན་ ཚ་བ་མེ་ནང་མ་ཤོར་ གྱངམ་ཆུ་ནང་མ་ཤོར་བར་ ཡོདན་ཡོད་པའི་ཆ་རོགས་དང་ མེདན་མེད་པའི་ ཆ་རོགས་བསླབ་བྱ་གནང་སྟེ་ ཆུང་ཚེ་རྐང་ཐངས་དྲངས་ སྦོམ་ཚེ་མི་གྲལ་ཚུད་གནང་པ་གིས་མ་ཚད་ དྲོ་པ་ཧ་སག་ངེ་གི་དོན་ལུ་སྨོན་ལམ་དང་ ཕྱི་རུ་ཕྱིས་ཤོས་བུ་ངེའི་མནོ་བསམ་གཏང་མི་ སྙིང་རྗེའི་རང་གཟུགས་ ཕ་མའི་བྱམས་བརྩེ་ལུ་བལྟ་སྟེ་ དད་པའི་མིག་ཆུ་དབང་མེད་ ས་ཁར་ཤོར་དོ།
ཚེ་ད་རིས་འཛོམས་པའི་ ཕམ་གཉིས་ དཀོན་མཆོག་གསུམ་གྱིས་ ཐུགས་རྗེ་ཡང་ཡང་གཟིགས་ བདེ་སྐྱིད་ཕུན་སུམ་ཚོགས་ཏེ་ ལོ་བརྒྱ་དང་སྟོང་སྦེ་ བུ་ངེའི་མཆོད་པའི་རྟེན་དང་ སྐྱབས་དང་སྤུངས་གྲོགས་མཛད་པའི་ སྐྱབས་དང་མགོན་སྦེ་ བཞུགས་གནང་། བཀྲིན་ཆེ།
